I. JUJUR NGOLU / RIWAYAT HIDUP

Santabi godang ma di hamu saluhutna amanta Raja, Inanta soripada, Raja ni dongan tubu, Raja ni boru, Raja ni dongan sahuta, Raja ni aleale, tar lumobi ma dihamu Raja ni hula-hula nami saluhutna. Loas hamu ma jo au songon anak siangkangan ni damang on patoranghon jujur ngolu manang Riwayat Hidup ni damang on. Ia damang on namargoar HOTMA LUMBANTOBING, tubu tanggal 17 November 1950, ima natinubuhon ni oppugn nami Op. natigor Lumbantobing na hinan, namangalap boru no raja i boru Lumbantoruan sian huta Siborongborong on. Ia gelleng ni oppung nami on 6 halak, tolu (3) ma i Baoa dohot tolu (3) Boru. Ia siangkangan ima bapatua nami, Op. Theo Basa Manatar Lumbantobing nahinan, namangalap boru ni rajai, boru Hutagalung sian Tarutung. Sipaidua ima amang nami na tapaadop-adop on. Oppung nisi Rouli Doli, namangalap boru ni raja i, boru Lumbantoruan sian Nagasaribu. Sipaitolu, ima Amang uda nami Ama Neva Lumbantobing, namangalap botu ni raja i, boru ni tulang nami boru Lumbantoruan sian Siborongborong. Namboru nami siangkangan namarhamulion tu amangboru nami marga Hutasoit tu huta Hutasoit Pardomuan. Ia Namboru nami sipaidua namarhamulion tu amangboru nami marga Siregar tu huta Pangaribuan. Namboru nami nomor tolu marhamulion tu amangboru nami marga Nababan tu huta Sitabotabo.

II. PAR PINOMPARAN NI DAMANG ON

Dibasa-basahon Tuhan do di damang on, Opat (4) dakdanak, Dua (2) ma i baoa dohot Dua (2) boru. Anak siangkangan i ma au sandiri, Benny Lumbantobing, dang marhasohotan dope. Anak sipaidua, Remon Lumbantobing, dang marhasohotan dope Boru Siangkangan, Ruth Juliana boru Lumbantobing, nunga marhamulion tu lae name marga Lumbantoruan sian Pasar Siborongborong. Dibasa-basahon Tuhanta do di nasida tulo (3) dakdanak: 2 dakdanak baoa, 1 dakdanak boru. Boru si nomor dua manang siampudan, Rebecca Lumbantobing, dang marhasohotan dope. Jadi pungu ma sude pinompar ni damang on, anak, boru, hela, pahompu: 8 halak Marujung ngolu ma damang on di ari Jumat tanggal 1 Juni 2012, jadi gok ma umur ni damang on 62 taon.

III.

RIWAYAT PEKERJAAN

Andorang dingoluna mangula do damang on di Pemerintahan, jala sanga do gabe Kepala Pemerintahan di Kelurahan Pasar Siborongborong, mamukka sian taon (1986) sahat ro di pensiun taon (2006). Jala saleleng menjabat Kepala Kelurahan manjalo penghargaan do damang on sian Pemerintah Kabupaten Tapanuli Utara sebagai Lurah Teladan. Andorang di ngoluna, aktif do damang on di piga-piga organisasi, punguan, punguan marga, lingkungan dohot organisasi partai politik. Jala jot-jot do damang on dihunjuk jadi pimpinan manang uluan di angka punguan manang organisasi nanihutononna. Songoni ma jolo na boi dipajojor hami songon jujur ngolu ni manang Riwayat Hidup ni damang on. Laos marhitehon ima dihamuna amanta Raja dohot inanta soripada, Raja ni dongan tubu, Raja ni boru, Raja ni dongan sahuta, tarlumobi di hamu Raja ni hula-hula nami saluhutna asa boan hamu ma hami angka pinomparna ditangian muna, asa anggiat di tambai Debata pasu-pasuna di hami. Dapotan rongkap angka naso dapotan rokkap, dapotan jampalan na lomak angka naso karejo, tu pistarna angka na diparsingkolaan jala tu tiurna passamotan di hami tarlumobi di ina nami on. Botima Mauliate ma di hita saluhutna, mauliate ma nang di Tuhan ta.