PENGAWA NGAJAR ENGGAU BELAJAR BEGUNAKA KEREBAN TEKNOLOGI BARU KEMAYAHARITU

Maran RampingUniversiti Putra Malaysia

Abstrak

Pengawa ngajar enggau belajar ti begunaka ke kereban teknologi ba jeman dunia kemayaharitu endang iya chukup semitan sereta engkeman ari semua atur. Ari ubah pemansang dunya moden diatu mayuh macham pekara sereta perengka ti moden mega digaga datai ari penemu sekula, pansik enggau tempa siku-siku orang tauka gerempung ti benama. Tikas pelajar sekula nyau majak maju-semaju nitihka singkang ubah dunya mega. Atur pelajar nyau majak manah-semanah lalu bepelasarkan penemu, penau, penebela sereta ari chiri teknologi moden kediatu. Setipak enggau pengerembai penemu teknologi baru iya kelebih agi baka komputer tau bendar ngangkat sereta ngemujurka pengawa sekula di menua kitai tu. Ari pengawa ke belematika pemesai guna computer dalam atur enggau pemansang sekula di menua tu iya nya tau bendar meri pemansang ke enda besekat dalam atur ngemansangka pengawa belajar enggau belajar tu.

Artikel, Oktober 2014

Pengawa ngajar ti begunaka komputer kelebih agi ba atur pengawa enggau

pemansang sekula nyau pegari bendar diatu. Nitihka Halimah (1999) kereban

teknologi tu tau bendar narit ati laban iya tau meri empas ti manah sereta engkeman

lebuh ke beguna iya. Ari empas kereban teknologi ba atur pelajar kelebih agi ba

pengawa belajar iya chukup amat semitan. Teknologi ti baka tu ditaga tau bendar

ngubah chara ngajar lalu nembiak tau belajar nitihka penau diri empu. Proses

pengawa ngajar enggau belajar ti begunaka komputer tu tau mai penguntung sereta

empas ti manah laban iya ulih ngenataika bemacham-macham gaya atur dikena narit

ati bala nembiak sekula. Mohd Zaliman et al. (2001) nyata bendar madah ke

teknologi tu dikemendarka nyadi siti ari perengka tauka kereban ti beguna bendar

mantu bala pengajar nengkebang dunya pemandai enggau penau kemayaharitu.

Nitihka gaya singkang, pengerembai pengawa belajar begunaka komputer tu enda

ulih ditagang sereta dikemudika segapa. Pansik Norhashim et al. (1996) madahka

pengerembai sereta tikas pengawa belajar ti begunaka komputer tu semina proses

mantaika asil ari sukut peda mata aja belaluka chuan tauka ari lalau bup ti udah

ditagaka. Ngena chara teknologi tu ia tau bendar mai lalu ngemujurka pengawa

belajar tu engkeman sereta semitan agi laban iya mai ngagai pemerindang ati bala

nembiak sekula. Bala nembiak rindu ati belajar sereta ninga ke jaku pengajar sida.

Enti bala pengajar nadai dalam kelas sida tau mega belajar kediri empu aja ari

sukung sereta penau diri begunaka komputer.

Norhashim et al. (1996) mega madahka kereban teknologi komputer ti besangking

enggau isi pelajar ti udah ditaga nitihka sukat, atur sereta ririh pelajar tau bendar

ngasilka pemanah sistem tu. Laban nitih ku Brown et al. (1994) ari bungkur semua

atur sereta leman teknologi tu tau bendar meru chunto ke amat ungkup bala nembiak

ti deka belajar lalu ditambah enggau elemen-elemen bukai baka karang (teks),

musik, gambar, video dan engkeramba (animasi) enggau ti bukai. Pengawa belajar

begunaka komputer tu bendar mansang nitihka ubah dunya kemayaharitu. Tuju

sereta pengerembai pengawa ngajar enggau belajar endang iya ditaga tau manah

sereta ngutungka genap iku kitai ari ubah enggau chara baru dikena nyampaika isi

pelajar (Merril, 1992). Pekara tu mega senutuk enggau leman gaya kitai ulih belajar

ngati kediri nadai pengajar ba tisi.

Rangkum pengawa ti begunaka komputer dikena belajar endang iya mudah sereta

nyamai dibelematika. Begunaka komputer ukai siti ari penekul tang laban ari

rangkum isi, ripih sereta turai pelajar ti udah ditempa tau bendar meri penguntung

enggau empas ti menyana. Senutuk enggau tu, nagajar enggau belajar begunaka

komputer tau bendar meri pemujur sereta penguntung ungkup bala nembiak enggau

pengajar ba sekula jeman kediatu.

Kereban:

Brown, J. S. & Duguid, P. (1994). Stolen knowledge. Educational Technology, Vol. 33, No. 3, pp.10-15.

Halimah Badioze Zaman (1999). Multimedia dalam pengajaran dan pembelajaran. Kertaskerja Persidangan Kebangsaan Pusat Sumber Sekolah di Pulau Pinang. Januari.

Merrill, M. D. (1992). Constructivism and Instructional Design. In Duffy, T.M. & Jonassen, D.H. (Eds.),Constructivism and the Technology of Instruction: A Conversation, Hillsdale: Lawrence Erlbaum, 99-114.

Mohd Zaliman Mohd Yusoff & Manjit Singh Sidhu (2001).Teknologi Multimedia: Kaedah pembelajaran pelajar lemah dalam pelajaran. Pembentangan Kertas kerja Konvensyen Persatuan Teknologi Pendidikan Malaysia kali ke 14. Hotel Goldcourse, Kelang. 11 –14 September.

Norhashim, Mazenah & Alinda Rose (1996). Pengajaran Bantuan Komputer. Universiti Teknologi Malaysia. Kuala Lumpur: Dewan Bahasa dan Pustaka.