Takanon sandad id pogun Sabah

Insan tadau nokorikot iso tinimungan tanganak sikul mantad SMK Ipoh, Perak, tuminombului id Pogun Sabah mongoi takad do Nulu Nabalu. Minion yolo id asrama SMK Datuk Peter Mojunting, Penampang. Namot diolo do hilo id Penampang minimpanau yolo miampai piipiro tanganak sikul Kadazandusun do mooi intutun takanon, tua-ua’ toi nunu nopo koubasanan Kadazandusun id badi Donggongon. Iti no komi do tanganak Kadazandusun do popointutun i okito diolo.

“iti nopo nga tutan. Roso nopo rapaon diti nga opooit. Osonong do kakanan diti tu kaanu mogidu linasu id suang tinan tokou. Osonong iti do kakanan soira do sogiton. Opoto o rinapa diti nung samayan do bilis om lado topurak. Susunion nopo diti nga id dumo di notutudan”.

“iti nopo nga lomiding. Susumuni iti id disan kopuruan. Iti nopo nga spisis do pakis. Opoto kakaakanani diti. Ansakon miampai kinoring toi ko’ balasan. Au apangkal do mogihum diti. Osonong iti do akanon nung tibobolon”.

“iti nopo nga tuhau om bambangan. Amu nansak ilo. Totokon nopo ilo tuhau om ougan no om polongoton’ kawagu dilo tua’ bambangan. Bambangan nopo diti nga onsomon momoguno do linsou dau. Kopirolot nopo nga oonsom, opodos om oongid do tuhau. Kounsub do linasu iti”.

“iti nopo nga hinava toi ko’ rinawal winonsoi mantad tonsi sada mata. Koubasanan nopo do sada gunoon nga tonggiri om kikir. Sinsibon i tonsi, posuangon id mangkuk om tunguhon do waig talasu. Kododob po do piipiro minit om tindahon om totokon nogi. Pagaan do tonsom kolopis, langatan tinanok bawang taragang om layo. Usian no ii do ula-ula koosino’ om nung aanangan nga abuli langatan do lado tokuudi.”