Keluarga tahun enda. Amin gia i bas tahun enda erbage...

PEKAN KEBAKTIN KELUARGA GBKP TAHUN 2020

1

Kata Penaruh

ujur sikataken man Tuhan Dibata si mada gerejanta, i bas penemani ras penaruhkenNa maka enggo seh kita ku bas paksa Pekan Kebaktin Keluarga tahun enda. Amin gia i bas tahun enda erbage bencana si reh

ku bas kegeluhenta, subuk pandemic covid 19 ras erupsi Deleng Sinabung tapi la engkurangi ketutusen ateta i bas ersembah ras erpengendes man Dibata.

Enggo si bentasi sada bagin pelayanen gerejanta, amin gia piga-piga program lanai terdahiken kita bagi semalna, tapi tahun pelayanenta tahun enda eme ”Meningkatkan Kemampuan Warga GBKP Dalam Pengelolaan Informasi dan Keterampilan Dalam Penggunaan Teknologi Informasi,” tuhu nampati kita guna ngelai perpulungenta i bas masa pandemic enda.

Tema Umumta i bas Pekan Kebaktin Keluarga tahun 2020 enda eme Jabu Si Paguh Erkiteken Kuasa Kristus (Pil.4:13). Enda mbabai kita gelah kerina jabu-jabunta tetap paguh anem iderpa erbage persoalen nggeluh paksa enda. Dampak bencana Covid 19 ras Erupsi Deleng Sinabung enggo engkenai erbage dampar kegeluhen subuk kesehaten, ekonomi, persekolahen, relasi ras erbage si deban. La lit gegehta selain ernalem kita man Tuhan si mada doni ras kegeluhenta. Bage me kari sidalani seh pitu wari/berngi kita ngikuti Pekan Kebaktin Keluarga enda. Tema-tema i bas wari si terusna eme Ersembah I bas Jabu, Jabu Si Mejuah-juah, Ertambahna Min Keleng Atendu, Jabu Si Tetap Erdahin, Jabu Si Erbudaya, ras Jabu Si Maba Dame. Alu tema-tema ras Kata Dibata si aloken kita kidekah Pekan enda maka si arapken tuhu-tuhu mereken pergegeh ras pengarapen si paguh man banta mentasi wari-warinta ku bas wari-wari si reh enda.

Pekan Kebaktin Keluarganta tahun enda pe tetap mpersiapken kita guna mengketi minggu Advent ija kita kerina ersikap guna ngalo-ngalo kerehen Jesus subuk i bas perayan Natal bage pe kerehenNa mulihken ku doni enda. Melala si banci si evaluasi i bas si enda, subuk dirinta i adepen Dibata bage pe perayan-perayan si ban kita gelah ula terjeng rutinitas ras seremonial tapi la mbaba perubahen kegeluhen ku si terulin bagi si ngena ate Dibata.

B


2

Rikut pe uga kita ngalo-ngalo tahun pelayanen 2021 si uga kita nggejap ras ndalanken maka ‘Anak Si Nguda jadi pasu-pasu i bas kegeluhen enda. Lanai terjeng ninta anak si nguda “pemilik masa depan”, tapi si tuhuna maka anak si nguda pe “pemilik masa kini.” Emaka si pakeken ia i bas erbage pelayanen gerejanta ras kegeluhenta.

Moderamen ngataken bujur man Tim PPWG ras Percetaken Abdi Karya si enggo ngaturken ras ngelitken bahan Pekan Kebaktin Keluarga enda, janah Dibata si tetap terpuji i bas kerina pelayanenta. Bage pe BPMK ras BPMR si enggo ngaturken kerinana seh maka banci erdalan alu mehuli. “Soli Deo Gloria”.

“Selamat Ngikuti Pekan Kebaktin Keluarga GBKP Tahun 2020”

Rikut Tabi Ras Mejuah- Juah,

MODERAMEN GEREJA BATAK KARO PROTESTAN

Ketua Umum, Sekretaris Umum,

(Pdt Agustinus P. Purba, S.Th., MA) (Pdt. Rehpelita Ginting, S.Th., M.Min)


3

DAFTAR ISI

Kata Penaruh ................................................................................................. 1

Daftar Isi.......................................................................................................... 3

1. Pekan Kebaktin Keluarga GBKP Tahun 2020

Wari Pemena (Tema : Jabu Si Paguh Erkiteken Kuasa Kristus) ............ 4


Wari Peduaken (Tema : Ersembah I Bas Jabu) ......................................... 12


Wari Peteluken (Tema : Jabu Si Mejuah-juah) .................................. 19


Wari Peempatken (Tema : Ertambahna Min Keleng Atendu) .............. 27


Wari Pelimaken (Tema : Jabu Si Tetap Erdahin) .................................... 33


Wari Peenemken (Tema : Jabu Si Erbudaya) .......................................... 40


Wari Pepituken (Tema : Jabu Si Maba Dame) ........................................ 50

8. Aron Penulis Bahan Pekan Kebaktin Keluarga GBKP Tahun 2020 .......... 58

9. Lembar Saran............................................................................................ 60


4

PEKAN KEBAKTIN KELUARGA GBKP WARI/BERNGI I

MINGGU, 15 NOPEMBER 2020

Tema Umum : JABU SI PAGUH ERKITEKEN KUASA KRISTUS (Pil. 4 :13)

PERSIKAPEN

Adi Pekan Kebaktin Keluarga enda ilakoken i rumahta sekalak-sekalak maka adi la serayan Tuhan (Pdt, Pt/Dk) si mbabaisa maka votum, salam ras pemasu-masun la padah sibelasken.

Adi enggo banci ilakoken i bas sektor entah jabu kepkepen maka enggo banci sidalanken bagi semalna saja siikuti Panduan Adaptasi Kebiasaan Baru.

Adi via daring (zoom, google meet rsd) maka banci siaturken rikutken situasina gelah erdalan kerina alu mehuli.

Siusahaken maka anak-anakta pe terlibat i bas Kebaktinta enda.

KEBAKTIN (I babai Sekalak Pt/Dk, adi i rumahta sekalak-sekalak, ibabai bapa entah nande)

Senina ras turang, bekas penaruhken ras penegu-negu Dibata sibengketi me sendah Pekan Kebaktin Keluarganta wari si pemena. Tema umum Pekan Kebaktin Keluarganta tahun enda eme “Jabu Si Paguh Erkiteken Kuasa Kristus” (Pil. 4:13). Tema enda jadi sada pergegeh man banta i bas masa pandemic covid 19 enda. Si idah jine uga meterna perubahen kegeluhen si terjadi, piah menam lanai kita ngasup guna ngikutisa erpalasken situasina. Subuk i bas dampar kesehaten, ekonomi, pendahin, adat kerina arus ndalani “Adaptasi Kebiasaan Baru.” Emaka arah sada minggu Pekan Kebaktin Keluarga enda ateta reh gegehna ras reh paguhna jabunta i bas ngalaken kerina kecibal enda erkiteken kuasa si ibereken Kristus man banta. Mari dage senina ras turang sibengketi kebaktinta alu ras-ras kita mpesikap pusuh ras perukurenta guna jumpa ras Dibatanta. Mari radu ras kita ertoto......


5

Mari ras kita kerina rende alu dem keriahen i bas KEE 399:1-2 (Per. Tedis) Mari surak puji Tuhan, Endeken nde enden m’riah O surga, doni ersurak kerina

Mari rende muji IA, alu ukur si meriah Puji gelarNa si Badia Reff.. La erngadi-ngadi, ku puji Kam Tuhan Bas k’rina dampar kegeluhen Ersurak m’riah, pusuhku i bas Kam Terpuji Tuhan rasa lalap

Mari k’rina manusia, si puji dage Dibata Rendelah, ersuraklah kita k’rina Ersadalah ukurta e, mujiken gelar Dibata Ersurak dage, kita k’rina Reff : …

(Sanga rende ngendesken perlengkapen man per-Liturgis) VOTUM RAS SALAM L Kebaktin enda lit i bas gelar Dibata Bapa si njadiken langit ras doni, i

bas gelar AnakNa Jesus Kristus si jadi juru selamat man doni enda ras i bas gelar Kesah Si Badia si jadi penampat man banta (bandu) i bas mentasi kegeluhennta (ndu).

Perkuah ate ras dame i bas Dibata Bapa, AnakNa Jesus Kristus ras Kesah Si Badia nemani kita (kam) genduari seh rasa lalap. Amin.

P Amin.....Amin.....Amin.....(iendeken) L TUHAN erbanca aku megegeh dingen paguh, IA si enggo mulahi aku

(Msm. 118:14)

Meriah ukurta i bas penemani ras penaruhken Tuhan kegeluhenta, mari dage radu ras kita rende nggejapken penjujuri Dibatanta i bas KEE No. 181:1-2

Segedang-gedang geluhku, itemani penebus, Labo kai pe lit si kurang, adi tanNa negu t’rus, Dame surga lit ‘bas aku, iusekenNa bangku, Kegeluhen jadi senang, Kai pe la lit si kurang, Kegeluhen jadi senang, Kai pe la lit si kurang,


6

Segedang-gedang geluhku, Kubentasi k’rina e, ‘Di si mberat reh man bangku, IA penahangisa Labo pediatNa ndabuh, Minter kal iangkatNa Lalap i jagaiNa aku, Iban keleng ateNa Lalap i jagaiNa aku, Iban keleng ateNa (Perp. Kundul)

KINIULIN DIBATA INGAN CICIO L Malem ate kalak si cio ras cilinggem i bas TUHAN, sabab IA kap si mereken ketenengen dingen kedamen. Bapa IA kap Dibata si la pernah nadingken bekas tinepaNa. Nande La ipeturutNa kita erdalan si sada i bas kegeluhen enda Anak Igejap kami keleng ate Tuhan tetap nemani perdalanen jabunta L Terpujilah gelarNa seh rasa lalap i bas jabunta P IA ngenca patut i sembah, dingen man baNa pusuhta malang. Kerina Terpujilah Dibata arah kerina perdalinen jabunta. Amin.

KEE No. 334:1-2 “TUHAN KAP SI EMPUNA GELUHTA “ Tuhan kap si empuna geluhta Gegehta IA si merekenca Kiniteken pe ras pemetehta E pe IA si njujurkenca IA kap erbanca kita sangap Tetaplah man IA kita ngarap Di reh susah b’reNa serpang pulah Tendi kula mejuah-juah Dage tetaplah bulat ukurta Geluhta pe lalap min erguna Lagu langkah pe la sia-sia Gelar Tuhanlah ermulia Adi jumpa kita si mesera Pengarapen ula kal min pera Kune riah ukur kita jumpa Nehken bujur ula kal lupa


7

KEARUN ATE NDALANI KEGELUHEN L TUHAN setia, dem keleng ate, janah IA Dibata si la pernah

mobah lias ateNa. Bapa Amin bage gia rusur nge kami dem aru ate ras kebiaren i bas

ndalani kegeluhen enda. Nande Kami pe megati kote i bas ngalaken erbage perbeben si reh i

bas kegeluhen kami piah megati lanai ieteh kami kai si arus i bahan kami.

Anak Kami pe selaku anak-anak megati aru ate kami kerna masa depan kami, uga nge pagi kecibal kami ate kami.

L Mari radu ras kita rende ngakuken kerna kekotenta selaku bapa, nande ras anak-anak alu rende i bas KEE 377:1-2

Ku akuken me dosangku i lebe Tuhan Megati aku lalar bas kegeluhenku Keleng ateNdu, pengarapenku I teruh perkuahNdu malem me pusuhku

Keleng ateNdu, pengarapenku I teruh perkuahNdu malem me pusuhku Erlebuh aku baNdu O Yesus Tuhanku Alemi min O Bapa salah ras lepakku Keleng ateNdu pengarapenku Tedeh teku ngidah belinna perkuahNdu

Keleng ateNdu pengarapenku Tedeh teku ngidah belinna perkuahNdu PERGEGEH I BAS DIBATA NARI (Perp. Tedis) L Meriah ukur Dibata ngidah teptep kalak si nggit ngakuken kekotennta

dingen nggit mpelimbarui kegeluhenna. Nina Dibata, Inget maka enggo Kuperentahken man bandu gelah tetap ukurndu ras tek! Ola kam mbiar, ola aru atendu, sabap Aku TUHAN Dibatandu, tetap ras kam ku japa pe kam lawes." Jos 1:9). Mari radu ras kita rende i bas KEE No. 423:1-2


8

Kam nebusi aku Tuhan, Kam si peteneng tendingku Tendi si ndube tertaban, teguNdu ku adepenNdu Reff : Malem kal ateku Bapa, ban keleng ateNdu Ku puji gelarNdu Bapa, mulia gelarNdu TeguNdu lah aku Tuhan, i bas pusuhku Kam ringan PetetapNdu aku Tuhan, lah dosa talu me ku ban Kam ngalemi aku Tuhan, Kam si pepalem pusuhku Pusuh si megati nogan, mbaru perbahan kelengNdu Reff : … (Per. Kundul) NEHKEN KATA DIBATA L Seh me paksana pengogen Kata Dibata si pemena. Pengogen si

pemena i bas Masmur 16:1-11 iogeken si mada jabu..... (Dung pengogen si pemena) Ketuahen kalak simegiken Kata Dibata dingen si ngelakokenca i bas

kegeluhenna si teptep wari. Haleluya. P Haleluya.....Haleluya.....Haleluya..... L Kotbah (ertoto sope ras kenca) Kotbah : Pilipi 4:10-13 Tema : Jabu Si Paguh Erkiteken Kuasa Kristus

Renungen Labo tanggung kiniseran Paulus i bas meritaken Berita Si Meriah. Si enda pernah iturikenna man Perpulungen Korinti. Banci si oge i bas 2 Korinti 11:23-28. Usuren aku ipenjaraken. Usuren aku iligasi. Gatin aku menam mate. Lima nembas aku iligasi kalak Jahudi; telu puluh siwah kali teptep nembas. Telu kali aku igudam kalak Roma janah sekali aku ibenteri alu batu. Telu kali karam kapal si kutumpangi, janah sekali bombang-bombang aku i babo lawit sada wari sada berngi dekahna. I bas perdalanen-perdalanenku, megati aku jumpa bahaya: bahaya lau mbelin, bahaya kena rampok, bahaya erkiteken teman sebangsangku ras i bas bangsa si deban nari, bahaya i bas kota ras i bas ingan si mesawang, bahaya i lawit, bage pe bahaya i bas teman si pekulah-kulahna


9

erkiniteken. I bas aku erdahin mberat dingen latih suhsah e, megati aku la terpedem, megati muas dingen melihe; megati la lit si man panganenku, megati bergehen erkiteken kurang uis. Tambah i bas paksa ia nuratken suratna enda ia pe sangana i bas penjara i Kota Roma erkiteken Berita Si Meriah. Nggeluh i bas penjara tentu enggo me melala kiniseran si inanamina. Tapi i bas si e, lit gegeh Paulus i bas ngalaken kerina kecibalna. Emaka tupung si oge suratna enda si idah rahasia gegeh Paulus. Emaka ngasup denga ia ermeriah ukur, nina “mbelinkal keriahen si kugejapken erkiteken persadanku ras Tuhan.” Kunci si pemena ulu keriahen Paulus eme “persadanna ras Tuhan.” Persadan ras Tuhan ertina nggeluh i bas Tuhan, ngikutken perentahNa ras tetap lit hubungen arah toto ras ende-enden pertendinna katawari pe man Tuhan. Jenari pertumbuhen kiniteken perpulungen Pilipi pe jadi keriahen man Paulus si enda teridah arah iperdiateken perpulungen enda Paulus alu ngkirimken keperlun geluhna. Ituriken Paulus pe maka ia enggo erlajar encukupken kai si lit i bas ia. Enggo ietehna nggeluh i bas kekurangen bage pe i bas kelebihen. Tupung i bas kekurangen la bene pengarapenna, tupung i bas kelebihen ipakena bagi si ngena ate Dibata. Emaka banci si duga sanga ia erdahin erban tenda, duit si datna ipakena nampati teman-temanna sada aron bagi Timotius, Titus ras temanna si deban. Enggo idat Paulus rahasia nggeluh, emaka uga pe kecibalna maka ia tetap ermalem ate. Lanai kecibalna si mpengaruhi pusuh ras kegeluhenna, tapi ia jine si enggo ngkusai kecibalna. Nina alu tangkas, “Ngasup aku ngalaken kerina keadaan erdandanken kuasa si ibereken Kristus man bangku.” Maka ngasup perban gegeh Kristus. Kai dage rahasia gegehna? Jelas e me nggeluh i bas Kristus. Bage pe i bas pengogen si pemena si idah uga pemasmur ngataken maka ia ernalem kempak Dibata. Janah i bas penalemenna man Dibata ietehna maka kerina si jadi man bana mehuli. La lit si la mehuli adi nggeluh i bas Tuhan. Man banta pe paksa genduari enda, maka virus corona enggo mbaba dampak i bas kerina dampar kegeluhenta. Enterem temanta si lawes nadingken kita, si sakit, si PHK, si tumpur usahana, si la lako binagana, si lanai banci jumpa ras si ikelengina, si itunda perjabunna, si lanai terbiayai anak sekolah. Dampak e seh


10

ku persekolahen anak-anakta, pendahinna ras masa depanna. Negara pe terancam resesi janah langa si eteh uga pagi kedungenna. Tambah uga kita nggeluh i bas “adaptasi kebiasan baru.” Ija nari nge gegehta ngalaken si enda ras anak-anakta kerina? La lit si deban maka bagi Paulus ras Pemasmur Daud ku Tuhan kita ernalem, ije si arapken gegeh ras penampatNa man banta. Maka bagi lalana ndai perbeben Paulus ngasup ia ngalaken kerina kiniseranna, bage me pe tentuna kita kerina maka kita pe ngasup ngalaken kerina kecibalta, erkiteken persadanta ras Tuhan. Sekalak si enggo mbalu pernah isungkun temanna nina, “Kuidah teneng kam rusur ndalani kegeluhen enda ndai, uga nge ban kena kadih? Nina ngaloi, “Kai kin si perlu ikebiarken teman, aku adi endesken man Tuhan ningen endesken bage ngenca ku eteh. Tek aku labo itadingken Tuhan e aku, janah sampatiNa aku ateku. E ngenca teman labo lit si deban.” Jababen sederhana enda jadi tambar man banta paksa enda. Labo perlu mbue teori i bas erkiniteken ras erpengendes man Tuhan, si penting tek kita janah erpengendes kita tuhu-tuhu man baNa, maka lit nge si mehuli si enggo isikapkenNa man banta kerina.

(Ertoto kenca Kotbah) PENGAKUN KINITEKEN (Perp. Tedis) L Mari radu ras kita ngakuken kinitekenta raduken kerina kalak Kristen i

bas kerina paksa ras ingan i doni enda ninta dage radu ras, Aku tek man Dibata Bapa,...............

PERSEMBAHEN (Kundul) L Seh me paksana kita ngendesken persembahen pengataken bujurta

man Dibata. Kata Dibata si jadi palas i bas kita nehken persembahen eme i bas Masmur 34:2, “Lalap aku ngataken bujur man TUHAN kupuji IA la erngadi-ngadi.” Tupung si endesken persembahenta ras kita rende i bas KEE 445:1-2.

Si pepulung me persembahenta, si endesken dage man Dibata Tanda m’riah ukur, ban pasu-pasuNa, si simpar breNa man banta Reff : Asa si enggo isikapken, asa si nggo itotoken, Em pengataken bujurta, kempak Dibata

Tuhu simpar pemere Dibata, man perjuma ras si erbinaga K’rina si erdahin, si ngarap man baNa, i tuahi pasu-pasuNa Reff : …


11

Pertoton Persembahen ras Syafaat (Ibagi topik pertoton syafaat) Sekalak bapa : Notoken Kata Dibata ras kiniteken jabu Sekalak nande : Notoken kerna masa depan jabu, pendahin ras kesehaten Sekalak anak : Persembahen ras bangsa ras Negara. TEKAT NGGELUH I BAS TUHAN (Perp. Tedis) L Geluhkenlah geluhndu i bas Kristus Bapa Ateku tetap nggeluh i bas Tuhan Nande Tuhan kap gegeh jabu kami Anak Tuhan penalemen kami suari berngi Kerina Lanai kami mbiar mentasi wari-wari kami L Rende kita sekali nari guna mpeteguhi perpadanenta i bas KEE 413:1-2 Kawali perpulungenNdu Tuhan, i bas ndalani geluh I bas geluh susah tah senang, subuk ngalo ntah mere Tegu perpulungenNdu Tuhan, jagai i bas tanNdu Babai ku bas lau maler si teneng, bas dalin kiniteken

Tuahi perpulungenNdu Tuhan, si maba pusuh dame Si nggeluh mereken pengarapen, si dem i bas kekelengen Sampati perpulungenNdu Tuhan, bas jumpa percuban Babai ku bas lau maler si teneng, bas dalin kiniteken

L Ras kita ertoto bagi ni ajari Tuhan ninta dage: O Bapa kami..... Alokenlah pasu-pasu idur Dibata nari si jadi gegehndu mentasi kerina kegeluhenndu. “Ola mbiar, sabap Aku kap ras kam! Aku kap Dibatandu, e maka ola atendu aru. Kusampati kam, janah Aku mahanca kam megegeh. Kukawali kam, janah Kukelini pe.” (Jes.41:10). Amin.

P Amin.....Amin.....Amin...... (iendeken)

DISKUSI 1. Kai ertina nggeluh i bas Kristus? Turikenlah. 2. Lit nge si gejap ulihna sedekah enda nggeluh i bas Kristus? Saksikenlah.

Dalankenlah kai kesaksin nggeluh si mehuli idatndu i bas diskusi enda.

Pdt. Yunus Bangun, M.Th.


12

PEKAN KEBAKTIN KELUARGA GBKP WARI/BERNGI II

SENIN, 16 NOPEMBER 2020

PERSIKAPEN





KEBAKTIN Ngendeken ende-enden Pujin man Tuhan (ibabai Pengurus PJJ, MC, adi bas

jabu ibabai anak)

Rende: 3x Ku kasihi kau dengan kasih Tuhan Ku kasihi kau dengan kasih Tuhan Ku lihat di wajah mu kemuliaan Raja ku kasihi kau dengan kasih Tuhan

Ertoto

Kata Penaruh (ibabai Pt entah Dk)

Mejuah-juah man banta kerina perpulungen si ikelengi Tuhan. Wari/

berngi si peduaken kita pulung ka i bas jabu enda lako nerusken Pekan

Kebaktin Keluarga. I bas kesempaten enda ibabai kita ras isi jabunta lako

tetap ersembah alu tutus, benaken i bas jabunta nari. Kita ersembah

nehken kehamatenta man Tuhan si teptep wari mpekena-kena ras

mereken kegeluhen man banta. Mari dage si dahi Tuhan, si sembah IA alu

pusuh meciho ras dem pengataken bujur.


13

Rende : KEE No. 348:1,2,7 (Perp. Tedis)

Ersembah perlu i bas doni enda, e desken bingke bas kegeluhenta Ersembah em pedah kata Dibata, pehaga Tuhan bas kegeluhenta

Isuruh Tuhan lah kita ersembah, peturah penggejapen si meriah Kita diloNa lah tutus min gelah, ngajuk kerina teman reh ersembah

Ersembah em kap geluh teptep wari, lagu langkahta encidahken mehuli Mari ersembah Dibata sidahi, cidahken ukur erbahan mehuli

(Tupung rende, iendesken perlengkapen si mabai kebaktin)

Votum Kebaktin enda lit i bas gelar Dibata Bapa, AnakNa Jesus Kritus ras Kesah Si Badia Salam Perkuah ate ras dame i bas Dibata Bapa, Tuhanta Jesus Kristus ras kerembaken Kesah Si Badia ras kita (kam) kerina gelah. Amin Perp. Amin…Amin…Amin (iendeken)

Invocatio Tupung aku tayang i das ingan medemku, ku inget Kam; gedang-gedang berngi rukur aku kerna Kam (Msm.63:7)

Rende : KEE No. 388:1,3 Tupung tayang aku nginget Kam, gedang berngi ku ukuri Kam Sabab Kam si nampati aku, O Dibata tedeh teku Kam Reff : O Dibata Kam kap Dibatangku, kudahi tedeh ateku Kam Mesikel aku nandangi Kam, desken taneh si enggo kerah Bage me muasna tendingku, man baNdu Tuhan Dibatangku

Nteguh cikep tanku o Tuhan, teneng ukurku adi ras Kam La ku mbiar jumpa percuban, malem ate di rembak ras Kam Reff : …

-----------------Perp. Kundul-----------------------

Kinata Jabu-jabu Perpulungen L I bas ndalani wari-wari kegeluhen, erbage dalanna si erbahansa ateta ceda bage pe si erbahan ateta meriah. Tupung situasi susah, enterem si nilah bas erkiniteken, iarapkenna gegeh ras penampat kalak si deban. Kuasa Dibata e tempa la ernanam man bana. P Payo Tuhan, apai ka wabah virus Corona enda la erngadi-ngadi, tersungkun rusur bas pusuhku, uga nge pagi kedungenna, tuhu kin lit Tuhan si nampati?


14

L Enterem kalak si njadiken teknologi jadi dibatana, sebab teknologi akapna si banci njabab persoalenna, teknologi banci nehi sura-surana, emaka enggo akapna perlun HP asangken kata Dibata. Erkiteken melala kesibuken arah HP, enggo lupa ersembah i bas jabu.

P Tuhu latih kal akap kami ndalani wari-wari Tuhan, ku jah-ku jenda kami ndarami serpang pulah, seh maka lupa kami ersembah, nehken kehamaten kami man baNdu. Lupa kami adi ndauh ras Kam reh latihna akap kami ndalani kegeluhen.

L Si akuken kelepakenta i bas kita la setia dingen kurang tutus ersembah man Dibata arah ende-endenta KEE no. 436:1,2

Kuakuken kerina salahku, i adepen Dibatangku Tuhu ku gejap mbue dosangku, meluat nari kal pergeluhku Reff : Mekuah min ateNdu aku, sasapkenlah dosangku O Tuhan tegulah min aku, lah tetap jingkangku

Lalap ku inget salah dosangku, ku gejap salah lepakku Dosa nge lalap perbahanenku, ku lakoken si la ngena ‘teNdu Reff : …

L Ola iakapndu sia-sia si tersurat i bas Pustaka, "Kesah Si Badia si itamaken Dibata i bas kita, ersura-sura gelah kita setia man baNa." Amin bage gia belinen nge lias ate si iberekenNa asangken cemburuNa. Bagi lit tersurat i bas Pustaka Si Badia, "Itulak Dibata nge kalak si meganjang ukurna, tapi man kalak si meteruk ukurna iberekenNa lias ateNa." (Jak. 4:5-6)

Turang ras senina meriah ukurta ngaloken perkuah ate Dibata si mbelin e. Emaka si puji IA arah ende-endenta KEE No.311:1,3

Pujilah tendingku puji Tuhan, segedang-gedang geluhku Ateku ersembah rasa lalap, ban keleng ateNdu tetap IjujuriNdu geluhku, dage ku puji Kam Tuhan, Haleluya…Haleluya

Kam me kap o Tuhan penampatku, malem kal ateku banNdu ibegikenNdu kap pertotonku, sebab setia Kam tuhu Kam kap si nepa k’rinana, Kam me tetap si njayamsa Haleluya..Haleluya

Ngoge Kata Dibata L. Turang ras senina seh paksana kita ngoge kata Dibata si pemena ibuat i

bas : Heber 10:19-25 (iogeken si mada jabu)


15

L. Ketuahen kalak si megiken kata Dibata dingen si makekenca i bas geluhna si teptep wari. Haleluya

P. Haleluya.....Haleluya.....Haleluya (iendeken)

Kotbah : Daniel 6:1-10 (Ertoto ope ras kenca Kotbah) Renungen:

Ersembah I Bas Jabu Ersembah eme sada perbahanen si encidahken kehamaten man Dibata, si erkuasa ngaturken kegeluhen. I bas ersembah e kita jumpa ras Dibata. Alu ukur si meteruk, siakui ndauh belinen Kuasa Dibata e asangken gegehta. Si gejap, kita e terjeng abu taneh, si la ergegeh, banci lesap iembusken angin. Tapi Dibata la ngadi engkelengi kita si la megegeh e, isampatiNa, ikawaliNa ras iberekenNa keterkelinen i bas diri Tuhan Jesus Kristus. Eme dalanna kita ersembah alu mehamat ras dem pengataken bujur. Kehamaten e banci si tuduhken alu perukuren, perbahanen ras kata-kata si mehuli, atan ije pendahin si ngena ate Tuhan. Jadi, ersembah eme kegeluhenta si teptep wari. I bas nehken kehamaten man Tuhan, Daniel tutus dingen ratur ersembah. Amin ia paksana i kuta Babel, tetap setia ndalanken aturen agamana.

Tupung ia iangkat jadi gubernur i bas kerajan Babel, idahikenna dahinna alu payo ras dem tanggung jabab. Seh maka Raja Darius pe tek kal man bana. Tapi teman-temanna si ras erdahin bas kerajan e ernembeh ate man Daniel erkiteken cemburu, akapna enggo ngenan ate raja man Daniel asangken man bana kerina. Emaka idaramina dalan lako ndabuhken Daniel. Arah pendahin Daniel la sada pe datsa kesalahen, emaka ersada arihna ndarami kesalahen arah aturen agama. Iajukna Raja Darius mpedarat aturen gelah sedekah 30 wari ise pe la banci ersembah man dibatana seakatan man raja. Pemindon enda iueken raja emaka ipedaratna surat gelah asa kai kalak si tading i Babel bas 30 wari arus nembah man raja. Amin e aturen si ipedarat raja, la ngambati Daniel ersembah man Dibata. I bas loteng rumahna nari italangina jendelana, pengalana kempak Jerusalem, i je nari isembahna Dibata telu kali sada wari. Teridah ije keteraturenna ersembah, sikap erjimpuh nuduhken kiniteruken ukur dingen mehamat. Tek Daniel maka Tuhan nge singaturken kegeluhenna, emaka la aru atena amin lit ancamen itamaken ku gua singa. Kiniteken si paguh erbahansa la mbiar ngalaken ancamen ras perbeben.


16

Ingan ersembah la arus i rumah pertoton i Jerusalem tapi i bas kamar nari pe banci ersembah. Si nen pemasmur, i das ingan medemna nari iingetna Tuhan, i je nari iukurina kerna belinna perbahanen Tuhan man bana. Si nampati ia, dingen si erbahansa ia terkelin.

Arah Kata Dibata enda ngatakenca man banta maka i ja nari pe banci kita ersembah, subuk i gereja, i rumah, i kantor, i juma, ras i bas ingan si deban. Bagenda paksana pandemi Corona, iaturken maka kita Ibadah i rumah, amin piga-piga ingan nggo benakenna ibadah i gereja, kerina nge enda mehuli. Sebab Dibata ringan ijapa pe ras ngidah pusuhta si ersembah. Si perlu kal gundari i tengah-tengah perbebenta si mberat, erkiteken covid 19 enda, tetap reh ndahi Tuhan alu ukur si bersih. Lit relasinta si mehuli, dingen lit perjumpanta si ratur ras Tuhan. Jabunta tetap ersembah alu tutus. Ikataken jabu, eme bapa, nande, anak ras kerina si tading i bas jabu e. Kerina radu ras ersembah. Lit gia rungga si ngambati, banci pinakit entah kesibuken pendahin, la engkurangi ketutusenta ersembah. Ketutusen ras keteraturen jabu e ersembah erbahansa paguh ngalaken perbeben. Dage, sirembakkenlah dirinta ku Dibata alu tutus ate dingen kiniteken si tetap.

Pengakun kiniteken (Perp. Tedis) Persembahen (Perp. Kundul) L. Kata Dibata si jadi palas i bas kita ngendesken persembahen pengataken

bujurta i buat i bas Kuan-kuanen 8:21; ‘Man kalak si engkelengi Aku, Ku bereken kebayaken melala, rumahNa ku demi alu erta-erta si meherga.’

Iher kita ngendesken persembahenta si puji Tuhan arah ende-endenta KEE 420 :1-3

Asa gegeh ras kengasupen, kami nehken persembahen, Endesken kami bandu Tuhan, alu dem keriahen Reff: Ajari kami ngergaken, talenta ras kiniliten Arah ukur ras perbahanen, Tuhan ipermuliaken

Mbue tuhu kami aloken, pasu-pasuNdu o Tuhan KelengNdu igejapken kami, Kam kap si negu kami Reff : …

Arak-arak tetap o Tuhan, kegeluhen anakNdu e Gelah ngasup tetap o Tuhan, makeken si tading e Reff :…


17

Pertoton persembahen ras pertoton syafaat 1. Persembahen 2. Si mada jabu ras tuan rumah berngi si pagi 3. Gelah ngawan setia ras Tutus ersembah i bas jabu bage pe perpulungen 4. Ersembah jadi kebiasan nggeluh 5. Si turah i bas perpulungen

Perpadanen ras Tuhan (Perp. Tedis) L Turang ras senina di covid 19 enda lenga erkedungen, kesusahen reh

tambahna, sinuan la jumpa ergana, pendahin ras perbeliten reh urakna, man ise ngenda kita ngadu?

P Erpadan aku Tuhan, lanai ku darami gegeh si deban, Man bandu aku erpengendes, man bandu aku ngadu. I bas Kam Tuhan, aku megegeh.

L Teknologi tuhu mereken serpang pulah si kentisik, tapi lit ka nge keterbatasenna. Labo ia ngasup mereken kegeluhen si tuhu-tuhu man banta.

P Lanai kami nundalken kam Tuhan erkiteken kemanjun teknologi enda. Erpadan kami tetap setia dingen tutus ersembah man baNdu radu ras kerina isi jabu kami.

Rende: KEE 433:1-3 Ku sembah Kam bas geluhku o Tuhanku, pedahNdu me tetap jadi gelemenku Dame geluhku adi ras Kam o Tuhanku, la lit kebiaren malem tuhu pusuhku pasu-pasuNdu tetaplah min ras aku

Ajar min aku ermengkah ate baNdu, nembah erjimpuh ku Kam la ermedu Pedauh si ilat si ngerimrim geluhku, petetap ukurku di paksa kote aku keleng ateNdu tetaplah min ras aku

Kam min tetap si ngiani pusuhku, Kam min tetap si ngajari ukurku Demi min geluhku alu lias ateNdu, Jadi t’rang si ersinalsal i sekelewetku BereNdu gegeh man bangku o Tuhanku

Pertoton Tuhan


18

Pemasu-masun L Berkatlah! Dalani wari-wari si isikapken Dibata man bandu, setia

dingen tutuslah ersembah man Dibata i bas jabundu, si jadi gegehndu, alokenlah pasu-pasu idur Dibata nari. “Ipasu-pasu janah ikawali Dibata kita (kam), siang ayo Dibata ersinalsal i babonta (ndu) janah melias ateNa ngenehen kita (kam), itatap Dibata kita (kam) janah malem ateta (ndu) ibahanNa. Amin.

P Amin....Amin...Amin (iendeken). DISKUSI 1. Uga nge penggejapenta ersembah i rumah kita sedekah pandemi Covid-19

enda? 2. Kai banci tole si ban gelah reh tergejapna man banta maka amin gia lit

paksana ersembah i rumah kita, la ngurangi ketutusenta ersembah.

Pdt. Nurbety br Ginting, M.Th.


19

PEKAN KEBAKTIN KELUARGA GBKP WARI/BERNGI III

SELASA, 17 NOPEMBER 2020

PERSIKAPEN





KEBAKTIN 1. Kata Penaruh Mejuah-juah i bas gelar Tuhanta Jesus Kristus. Turang ras senina, sikataken bujur man Tuhan Dibata si enggo naruhken

ras mpersadaken kita pulung i bas Pekan Kebaktin Keluarga berngi/wari si peteluken enda. Berngi enda kita ipersingeti maka kesehaten e bagin si penting i bas kegeluhen manusia. Kesehaten kula mbelin kal kawitenna ras kesehaten pertendin manusia. Duana e radu ngkuhi. Erkiteken si e maka i bas njagai kesehaten pertendin, arus ka pe ijaga kesehaten kulanta. Gelah banci kulanta enda pe sipake lako muji dingen mpermuliaken gelar Dibata. Mari dage si pesikap pusuhta alu radu ras kita ertoto……

Turang ras senina si ikelengi Tuhanta Jesus Kristus, mari dage radu ras kita ngendeken KEE No. 205:1-2 “Rehlah min O Tuhan” (Perp. Tedis)

Rehlah min o Tuhan, sikap kami k’rina Ersembah man baNdu jenda Nusurlah min Tuhan, bahan sikap k’rina Ukur kami pe badia O Bapa, b’re gelah, daten pasu-pasu, kami k’rina enda


20

Tuhan Dibatanta, lit bas rumah enda Nembah kita k’rina baNa Alu kehamaten, mungkuklah man baNa Kula tendi pe kerina Aloken kataNa ras pasu-pasuNa, usekenNa banta 2. Votum + Salam L I bas gelar Dibata Bapa si enggo nepa doni enda, i bas gelar Jesus

Kristus si enggo nelamatken manusia, ras i bas gelar Kesah Si Badia si nemani ras engkawali manusia.

Perkuah ate i bas Dibata Bapa, i bas anakNa Jesus Kristus ras i bas gelar Kesah Si Badia. Amin.

P Amin…Amin…Amin… (iendeken) 3. Invocatio L “O temanku si kukelengi, ertoto aku gelah kai si mehuli jadilah

man bandu, janah mejuah-juahlah bagi kueteh maka kegeluhen pertendinndu pe mehuli” (3 Joh. 1:2).

Si puji Tuhan arah ende-endenta: KEE No. 412:1,3 “Bas Toto” Bas toto ku endesken geluhku, ku Tuhan si njayam kegeluhen Begiken min pingko-pingkoku Tuhan, latih mberat baban kegeluhenku

Malem tuhu adi kuendesken, k’rina perdalan kegeluhen Sabap Kam si negu-negu anakNdu, si tetap setia ernalem baNdu

------------------------Perp. Kundul------------------------

4. Pujin Kerna Pemere Dibata man Manusia L Dibata meteh kerina geluh manusia. IetehNa kerina sura-sura

manusia dingen katawari manusia kelsehen. P Terpujilah Tuhan, sabap ietehNa kerina si jadi i bas kegeluhen kami

manusia. L Dibata kap ulu pengarapen manusia, si mereken kesehaten kula

ras pertendin man manusia. P Ipuji ras isembah kami Kam Tuhan. Sabap i bas Kam nari kap kami

ngaloken kesehaten ras kejuah-juahen. L Pujilah Tuhan o kam tinepa Dibata, pujilah IA arah

perbahanenndu. E maka si pujilah Tuhan arah ende-endenta: KEE No. 424:1-3 “Ipuji Kami Kam Dibata Si Mbelin”


21

Ipuji kami Kam Dibata si mbelin, alu ende-enden si meriah Suari ras berngi kawali kami min, segelah la celus bas percuban Reff: Sangap kap kalak si ’rnalem baNdu e, daten tuah ras kesenangen pe Sangap kap kalak si ’rnalem baNdu e, daten tuah ras kesenangen pe

Dibata sajalah tetap si man pujin, endeskenlah g’luhta man baNa min Tetap IA si mperdiateken kita min, kelengNa man banta la erkerin Reff: Sangap kap kalak......

O kam si latih ras si maba beraten, dahi Bapa ib’reNa pengadin Bas kesusahen kam pegegehiNa pe, ras Yesus Tuhanta la kam bene Reff: Sangap kap kalak......

5. Kinilangasupen Manusia Njaga Kesehaten L Dibata nepa doni enda alu mehuli. IjadikenNa sinasa lit guna kiniulin

manusia i bas doni enda. P Ngaku kami Bapa, erkiteken kerangapen kami piah si mehuli e dungna

salih jadi kinilaulin i bas geluh kami. Pangan si ndube jadi kesehaten man kami, kedungenna jadi pinakit erkiteken kerangapen kami. Alemi min kami o Tuhan…

L Dibata mereken pemeteh man manusia gelahna pentar i bas njagai kesehaten kula ras pertendinna.

P Ngaku kami Tuhan, megati la ipake kami pemeteh si iberekenNdu guna njagai kesehaten kami. Iasamken kami rusur gegeh si lit i bas kami. O Tuhan alemilah kami…

L Marilah siakuken tole kinilangsupenta njaga kesehatenta i lebe-lebe Dibata arah ende-endenta: KEE No. 323:1-2

Sura-sura daging lawanlah tetap, je ‘di la kam talu tambah gegehndu Sura-sura jahat simbaklah tetap, ngaraplah man Yesus tentu kam menang

Reff : Pindo gegeh man Tuhan, gelah kam lalap paguh Ib’reNa kita menang, menahang ras senang

Tadingken si jahat olangi dosa, ukurndu meciho la ercinengga Pake kebenaren nggeluh bas terang, ngaraplah man Yesus tentu kam menang Reff : …


22

6. Padan Dibata man Manusia L Kata Dibata si jadi pergegeh man kalak si erpengarapen man Dibata,

niNa: “Tapi Aku kap si pepalem kam; Aku si nambari lukandu. Aku TUHAN kap si enggo melasken kata enda”. (Jer. 30:17b)

Malem kal ate kalak si tetap nggeluh erpengarapen man Dibata. Erkiteken si e mari dage si puji Tuhan alu ngendeken:

KEE No. 402:1-3 “Perban KekelengenNdu” Perban kekelengenNdu, tebusiNdu dosangku Alu mambur darehNdu, geluhku jadi mbaru Reff: Asa ngasup gegehku, kuikutken kataNdu Jesus Kam si perkuah, ku puji ras ku sembah

Perban kekelengenNdu, ibabaiNdu dalanku Ku dalan kesenangen, gelah aku terkelin Reff: Asa ngasup gegehku……

Perban kekelengenNdu, jadikenNdu geluhku Meherga ras erguna, desken batu permata Reff: Asa ngasup gegehku……

7. Kata Dibata a. Ngoge Kata Dibata Bagin Si Pemena (1 Timotius 5:23) iogeken si mada jabu L Ketuahen kalak si megiken Kata Dibata, dingen si makekenca i

bas geluhna si teptep wari, Haleluya. P Haleluya, Haleluya, Haleluya (iendeken) b. Kotbah (Masmur 38:8-18) Tema : Jabu Si Mejuah-juah (Fokus kesehaten keluarga : Perukuren ras Kula)

Lit sada pepatah si ngatakensa nina: mensana in corpore sano si ertina di dalam tubuh yang sehat, terdapat jiwa yang sehat. Ungkapen enda nuduhken maka kesehaten kula mbelin kal kawitenna ras kesehaten pertendin manusia. Kalak si kulana sehat, kecenderungen pertendinna pe sehat. Janah kalak si kulana sakit, lit kecenderungenna maka pertendinna pe banci ikut sakit. Aminna pe labo kerina pasti jadi bage. Sebab lit ka nge kalak si sakit tapi megegeh kal pertendinna erkiteken ia ertoto la erngadi-ngadi man Dibata.


23

Nggejapken pentingna kesehaten i bas geluh manusia seh kal pentingna gundari enda. Sebab alu litna kesehaten si paguh, erbahanca manusia pe ngasup ngidah pemere Dibata i bas geluhna.

Pemasmur ngangkai alu tuhu-tuhu kuga pentingna kesehaten e man bana. Enda me si iturikenna i bas Masmur 38 enda. Eme pertoton kerna kesehaten. Teridah i je maka pemasmur eme kalak si lit i bas keadaan sakit. Janah pinakit e enggo cukup mekelek i bas ia. Situasi si e situhuna mereken tekanen batin man bana. La terjeng suina pinakit e si arus ialakenna, tapi uga ka ia pe arus tetap erpengarapen man Dibata. Sabap megati kal reh kenca pinakit si mekelek e, pengarapen man Dibata pe reh urakna. I bas ayat 8 ikatakenna maka dagingku ngindet erkiteken pinakit, nuriken kuga suina iakapna erkiteken pinakit e. La ia banci ngelakoken kai pe erkiteken pinakit si lit i bas ia. Jadi lit dampak secara fisik ibahan pinakit e. Janah i bas ayat 9 ikatakenna tole nina: pusuhku getem, ndehereng aku ban suina. Pinakit e la kepe terjeng kula saja ngenca italukenna, tapi erdampak pe ku bas pusuh manusia. Pinakit e erbahansa maka pusuh e pe ikut ndehereng perbahan suina. Bage me situasi si igejapken pemasmur bas geluhna.

Ulih pinakit e pe kepeken erdampak ka nge arah kegeluhen sosial masyarakat. Enda igejapken pemasmur maka lit ka nge sanksi sosial si ialokenna erkiteken pinakit e. I bas ayat 12 iturikenna nina: teman-temanku enggo lanai nggit ndeher ras aku. Pemasmur pe nggejapken maka kalak si deban pe lanai nggit ndeher ras ia erkiteken pinakit e. Lit minter sanksi sosial si ialokenna i bas geluhna. Kalak si ndeher ras ia si sedekeh enda jadi teman man bana pe enggo lanai nggit ndeher ras. Apai ka adi i bas tradisi kegeluhen kalak Israel, kalak si sakit erkiteken perbahanen dosa si ilakokenna minter nge ipersilahang kalak si deban. Tentu enda labo sada sikap si mehuli. Kalak si erkiniteken arusna ngasup mereken pendampingen man kalak si lit i bas keadaan sakit. Kalak Kristen arus banci nuduhken ia teman situhu-tuhu subuk i bas keriahen bage pe i bas kesusahen. Enda me si ipetangkas i bas bahan invocationta nina: ”O Temanku si kukelengi, ertoto aku gelah kai si mehuli jadilah man bandu, janah mejuah-juahlah bagi kueteh maka kegeluhen pertendinndu pe mehuli” (3 Joh. 1:2). Njagai hubungen ras kalak si sangana sakit.


24

Kinipaguhen kiniteken ras pengarapenna man Dibata, mahanca pemasmur ngasup ndalani kerina situasi si e. Perbahanen kalak si deban la mpengaruhi kinitekenna man Dibata. Pemasmur tek maka Dibata meteh kerina situasi kegeluhenna (bdk. Msm. 38:10-11). I bas kinitekenna tek pemasmur maka Dibata pasti ngidah kuga beratna perbeben si arus idalanina i bas geluhna. Ras kinisuinna e pe seh nge terbegi man Dibata. Enda gambaren maka pemasmur ngidah Dibata e pasti tetap erdahin i bas geluhna. La ia nggit talu ibahan pinakit e, tapi erbelinna kal pengarapenna i bas Tuhan. Tek ia maka adi erpengendes ras ernalem ia kempak kuasa Dibata, tentu italukenna nge pinakit e. I bas Tuhan la lit si metahat. Sebab Dibata ngasup erbahan kai pe jadi tambar man manusia. Adi i bas ogen nina: ola kam minem lau saja, tapi inem pe sitik anggur maka sikap beltekndu, sebab megati kam sakit (1 Tim. 5:23). Selama manusia erpengendes man Dibata, maka kerina banci ipakeken Tuhan jadi tambar lako naluken pinakit si lit i bas ia.

Jabu kalak Kristen e me ingan nggejapken kuasa ras keleng ate Dibata si mbelin e. Enda me si jadi tantangen i bas masa genduari enda. Terlebih-lebih i bas kita ngalaken pandemi Covid-19 enda. Virus si la ngenca terjadi i bas negaranta, tapi enggo kerina negara erjuang naluken pinakit enda. Tentu kiniersadanta perlu kal i bas naluken pinakit enda. Sebab dampak pinakit enda labo hanya kerna kesehaten manusia saja ngenca, tapi seh ka pe ku bas kesehaten ekonomi manusia termasuk pe ekonomi jabu. E maka kita lanai banci kiam i bas situasi enda. Gundari arus kepe kita ngaloken situasi enda. Virus Covid-19 enda arus sialoken enggo jadi bagin i bas kegeluhen masyarakat. E maka perlu kal kita beradaptasi bas kegeluhenta. Beradaptasi e tentu alu cara njagai dirinta ras jabunta gelah ula terkena pinakit e. Adaptasina eme: make masker, jaga jarak, cuci tan, ula jemak alu tan mata, babah ras igung, rsd. Enda proses si ilakoken jabu kalak Kristen i bas geluhna. Arus lit genduari kesadaren i bas kita maka adi si jaga kesehatenta, e pe caranta ikut njaga kesehaten kalak si deban. E maka adi sehat aku, kalak si deban pe pasti sehat. Ibabo si e kerina tentu ertoto ras erpengarapen man Dibata si pentingna kal. Bapa, nande ras anak-anak aruslah ertoto man Dibata. Sebab pertendin si sehat mpengasup kita naluken pinakit i bas geluhta.

8. Pengakun Kiniteken (Perp. Tedis)


25

9. Persembahen Pengataken Bujur (Perp. Kundul) a. Seh paksana kita ngataken bujur man Dibata arah persembahenta.

Kata Dibata si jadi palas man banta eme kap: ”Endeskenlah kulandu man Dibata saja selaku persembahen si nggeluh rikutken si ngena ateNa. Sabap bage me arusna kam ersembah man Dibata selaku mahkluk si rukur.” (Rm. 12:1b).

b. Tupung kita ngendesken persembahen pengataken bujurta man Tuhan, ras kita rende arah ende-endenta: KEE No. 385 : 1-2

Babalah persembahen si merimna, ku adep-adepen Dibatanta Babalah korban pujin si mehaga, ku lebe altarNa si Badia G’lah tetap b’reNa pasu-pasuNa, man k’rina manusia G’lah tetap b’reNa pasu-pasuNa, terpuji gelar Tuhan

Babalah persembahen si jilena, ku rumah Dibata si perkuah Babalah korban pujin si merimna, ku adep-adepen si erkuasa G’lah tetap b’reNa keleng ateNa, ras lias ateNa banta G’lah tetap b’reNa pasu-pasuNa, segedang-gedang g’luhta

c. Pertoton Persembahen ras Safaat - Notoken gelah jabu mejuah-juah - Ngasup nggeluh alu kebiasan baru gelah tetap mejuah-juah kerina - Bangsa, negara ras gereja

10. Perpadanen Man Dibata (Perp. Tedis) L Kegeluhen e me sada pemere Dibata si mbelin man kalak si

erkemalangen man baNa. P Erpadan kami Tuhan, ngergaken kegeluhen si enggo iberekenNdu man

kami gelah banci jadi dalan kami ersaksi bas doni enda. L Jagailah kesehaten kulandu, gelah megegeh kinitekenndu. P Erpadan kami Tuhan, ngergaken kesehaten si iberekenNdu man kami.

Sabap adina sehat kula kami, maka pertendin kami pe ikut nge sehat. L Gelah reh tetapna ukurta i bas ndalanken padanta e man Dibata, ras

kita rende arah ende-endenta: KEE No. 381:1 Sura-sura Yesus bangku, ersinalsal tetap Ngeluh bujur ras mehuli, si ngena ateNa Reff: Ersinalsal terang, em sini suraken Yesus Ersinalsal terang, ku tetap ersinalsal


26

Ku pindo Yesus nampati njaga pusuhku Gelah ngasup ersinalsal ngikutken Tuhan e Reff: Ersinalsal terang…… 11. Pertoton Tuhan 12. Pemasu-masun L Bengketilah kegeluhenndu alu tetap erpengarapen man Dibata. Guna

jadi gegehndu, alokenlah pasu-pasu idur Dibata nari: “Ipasu-pasu janah ikawali Dibata kita (kam), siang ayo Dibata ersinalsal ibabonta (ndu). Janah melias ateNa ngenehen kita (kam). Itatap Dibata ku kita (kam), janah malem ateta (ndu) ibahan-Na. “ Amin.

P Amin…Amin…Amin… (iendeken)

DISKUSI 1. Erpalasken Masmur 38:8-18, kuga nge cara si perlu silakoken kune lit

pinakit i bas dirinta.

2. Kai-kai saja nge si perlu silakoken i bas jabunta i bas kita mengketi masa

adaptasi kehidupan baru si icanangken pemerintahta. Diskusikenlah!

Pdt. Dicky A. Bangun, M.Th.


27

PEKAN KEBAKTIN KELUARGA GBKP WARI/BERNGI IV

RABU, 18 NOPEMBER 2020

I. PERSIKAPEN





II. KEBAKTIN 1. Kata penaruh

Perpulungen sikelengi Tuhan, mari sibengketi kebaktin Pekan Kebaktin Keluarga GBKP wari si peempatken enda alu tema “Ertambahna min keleng atendu”. Meriah ukurta jumpa ras Tuhan i bas kebaktin enda. Ermulialah Tuhan arah persadanta dingen marilah sisehken puji-pujin ras pertotonta man Tuhan. Mari ras kita ertoto…….

2. Sipuji Tuhan ras kita rende KEE GBKP No.59:1 Keleng ateNdu tangkas bangku, Si kupujiken lalap min Kam Tuhan Yesus me Rajangku, sierkeleng man bangku kin Madin keleng ateNdu kuinget, asang k’rajangku me tersinget

3. Votum-Salam (Perp. Tedis) L Pekan Kebaktin Keluarga wari si peempatken enda ibenaken i bas gelar

Dibata Bapa, anakNa Jesus Kristus ras i bas gelar Kesah Si Badia. Perkuah ate ras dame i bas Dibata Bapa, i bas Jesus Kristus nari, i bas kerembaken Kesah Si Badia ras kita (kam) kerina gelah. Amin

P Amin…Amin…Amin…(Iendeken)


28

4. Invocatio L Si peduaken bali ras sindai e me ‘kelengilah temanndu manusia bagi kam ngkelengi dirindu’ (Mat.22:39).

5. Rende KEE GBKP No.177:1-2 Kekelengen ni Dibata, kekelengen Badia Nusur kap ku doni enda, nemani manusia Yesus Kam me si perkuah, bengketi pusuh kami AjariNdu kami gelah, ‘lah gelarNdu terpuji Usekenlah min kesahNdu, sanga m’riah ntah susah Cidahken kekelengenNdu, man gelemen kami lah Yesus Kam arapen kami, kekelengenNdu tetap Maka Kam lah teman kami, lalap seh rasa lalap

------------------------Perp. Kundul-------------------

6. Kerincuhen matuhi undang-undang Tuhan (Masmur 119:129-132) L Erdolat kap pengajarenNdu, emaka kupatuhi alu bulat ukurku P Adi ituriken ajarenNdu, mereken terang kap, mereken pengertin man kalak si langa erpemeteh L Kesah-kesah aku, i bas kerincuhen man peraturenNdu P Tulihken dingen mekuah min ateNdu aku, bali ras pengkelengiNdu kerina kalak si engkelengi Kam

7. Rende KEE No.281 : 1 (iendeken 2x) Kek’lengen Yesus kempak manusia, desken Dibata engkelengi Ia KekelengenNa maler kap man banta, adi sipakelah pedahNa Min sikeleng-kelengen kita kr’ina, bagi pedahken Yesus bas Pustaka Sababna kai sipindo bas gelarNa, ib’re Dibata man banta

8. Ngoge kata Dibata : Masmur 103:13-18 (iogeken tuan rumah) 9. Kotbah : Pilipi 1:8-11 (ibenai ras idungi alu ertoto)

Tema : Ertambahna Min Keleng Atendu

“Kekelengen banci igejabken la gia kita ndeher” kalimat enda mungkin cocok guna nggambarken keleng ate perpulungen Pilipi man Paulus si i bas penjara erkiteken dahin Berita Si Meriah. Sebalikna, kekelengen Paulus pe mbages kel man perpulungen Pilipi alu notoken dingen mereken surat kerna keriahen, kiniteken, kinigeluhen erkiniteken, ras lagu langkah kegeluhen kalak Kristen. Ituriken Paulus pe kerna keriahen, kemalemen ate si ibereken Dibata man kalak


29

si nggeluh i bas persadan ras Kristus. Kecibal pedauh ingan i bas i penjara la ngolangi kekelengen banci isehken. Erkiteken si enda me Paulus ermeriah ukur dingen tetap nginget perpulungen e dingen ngataken bujur ku Dibata.

Perpulungen Pilipi e me perpulungen si pemena si ipanteki Paulus i Eropah propinsi Roma i Makedoni. Surat Paulus man perpulungen i Pilipi enda isuratken sanga Paulus i penjara. Pilipi 1:8-11 isina pengataken bujur ras pertoton sapaat Paulus kerna perpulungen Pilipi. I inget Paulus kel perpulungen Pilipi, erkiteken perpulungen Pilipi nampati ia i bas dahin meritaken Berita Si Meriah. Perpulungen Pilipi tetap ikut muat bagin nampati Paulus la saja tupung ia ras-ras tapi tupung Paulus i penjara. Nina Paulus: Kuinget kenca kam, kukataken bujur man Dibatangku erkiteken kam (bdk. 1:3). Ay 8, Paulus nuriken maka tuhu-tuhu tedeh kel atena nandangi perpulungen Pilipi. Palas tedeh ate e me keleng ate si rehna i bas Jesus Kristus nari. Paulus nggejabken maka perpulungen e radu ras ia ngenanami lias ate si ibereken Dibata subuk Paulus i penjara bage pe nai asum ia bebas denga mpertahanken ras mpeteguhi Berita Si Meriah e alu tutus ate.

Ay 9-11, Paulus ertoto nandangi perpulungen Pilipi. Ertoto aku man Dibata gelah ertambahna min keleng atendu rikut ras pemeteh si tuhu-tuhu ras pengangkan si serta gelah ietehndu milihsa apai si mehuli. I bas pertoton Paulus ipindokenna gelah ertambahna min keleng ate perpulungen e. Kai si enggo ilakoken tetap iterusken dingen itambahi tole. I bas lenga serta lit denga kekurangen tetap ngukuri ras ndalanken si lebih mehuli guna ndalanken kekelengen. Perpulungen Pilipi la terjeng ngaloken Berita Si Meriah tapi neruskenca man kalak si deban. Kiniteken erbuah i bas keleng ate si reh na i bas Tuhan Jesus nari.

Kekelengen ilakoken alu palas penggejaben ras pengangkan maka labo erkiteken kebeluhen ras kengasupen Paulus entah pe perpulungen tapi erkiteken kuasa Dibata erdahin njemba Paulus, njemba perpulungen lako erBerita Si Meriah ras erbahan si mehuli dingen ertambah-tambahna kengasupen nehken kekelengen. Paulus tetap ertoto ras tek maka dahin si mehuli si nggo ibenaken tetap iterusken perpulungen Pilipi, sabab dahin si mehuli si enggo ibenaken e, eme dahin Dibata. Nggo ibenakenNa janah iteruskenNa. Pengarapen Paulus, geluh perpulungen Pilipi tetap itambahi alu


30

biak si mehuli. Jesus Kristus ngenca ngasup njadikenca, e me guna muji dingen pehagaken Dibata.

Kekelengen Dibata me palas i bas nehken kekelengen. Bagi si tersurat i bas nas ogen Masmur 103 : Bagi keleng ate Bapa man anak-anakna, bage kel me pengkelengi Dibata kalak si erkemalangen man baNa. Kalak si erkemalangen man Tuhan, tetap ikelengiNa. Kekelengen tetap idalanken rikutken kai si ipedahken Tuhan Jesus i bas nas invocatio : Si peduaken bali ras si ndai e me ‘kelengilah temanndu manusia bagi kam ngkelengi dirindu’ (Mat.22:39)

Kekelengen pengerakut persadan si nteguh antara Paulus ras perpulungen Pilipi. Kecibal si pedauh la ngolangi guna nehken kekelengen. Paulus ermeriah ukur dingen adi ingetna kenca perpulungen Pilipi e ertoto ia ngataken bujur man Dibata, igejabkenna maka si e kerina erkiteken Dibata erdahin i bas pusuh perpulungen. Kekelengen e teridah arah perbahanen si mehuli subuk i bas notoken bage pe i bas biak nampati. Gia Paulus i bas penjara kekelengen perpulungen i Pilipi tetap igejabken Paulus. Kekelengen e erbanca inget Paulus rusur perpulungen Pilipi e i bas totona dingen meriah ukurna gia ia lit bas penjara. Penjara la jadi tembok si ngolangi keleng ate Tuhan tetap erdalan. Tembok penjara jadi jarak tapi la erbanca la rembak erkiteken tetap ilakoken komunikasi subuk arah toto man Dibata, arah surat peseh ate tedeh. Bage min terus jadi i tengah-tengah gerejanta GBKP seh paksa enda, tetap radu mpeteguhi, radu notoken dingen tetap ndukung dahin ErBerita Si Meriah.

Kekelengen idalanken labo guna nuduhken kiniulinta ntah pe ngarapken kiniulin kalak si deban tapi erkiteken Dibata nggo lebe ngekelengi kita. Dibata si peturah pengangkan dingen njemba manusia lako ngkelengi. Terlebih i bas ngalaken keadaan si la semal, Pandemi Covid 19 si jadi paksa enda. Dibata mereken pengangkan man banta lako tetap ngkelengi dirinta bage pe ngkelengi kalak si deban, njagai dirinta ras njagai kalak si deban segelah la kena virus. Gia kecibal geluh bagi terpenjara paksa enda erkiteken ibatasi perdalanenta, arus jaga jarak la banci pedeher ras kalak si deban, si e kerina la erbanca urak ntah pe ngkurangi biak keleng ate man kalak si deban. Ertoto kita gelah ula kita si mbaba (carrier) virus man kalak si deban. Protokoler kesehaten tetap sidalanken i tengah jabu, i ingan erdahin, bage pe ingan-ingan si idahi kita.


31

Kekelengen ertambah-tambahna dingen terus idalanken, ula reh urakna. Terlebih i tengah-tengah jabu, kekelengen nggo idalanken Bapa, nande ras anak-anak. Tole min itambahi dingen teruslah idalanken. Si e erbahanca meriah ukur, lit pergegeh dingen peturah ate tedeh rusur nandangi anak jabu. Seh maka banci ras-ras ngataken bujur man Dibata dingen tetap ermeriah ukur sada ras si debanna erkiteken sigejab Dibata tetap ngkelengi kita ras anak jabunta seh paksa enda. Ertambah-tambahna kekelengen tetap ilakoken sabab e si erbanca meriah ukur dingen iinget rusur. Labo ingan ntah situasi erbanca jarak anak jabu sabab kekelengen njemba kerina isi jabu sitedehen lalap dingen sikelengen lalap dingen ertoto lalap man Dibata.

10. Pengakun kiniteken (Perp. Tedis)

11. Persembahen (Perp. Kundul)

L Rasa lalap ateku ngataken bujur man banNdu, erkiteken kai si ibahanNdu, o Dibata. Itengah-tengah perpulungen kalak si ertutus ate man banNdu kumomoken kiniulinNdu (Msm.52:11)

Rende KEE GBKP No.343:1,2

Pasu-pasu bas Tuhan nari, gejapken kami teptep wari Bas paksa-paksa geluh kami, Kam me kap tetap singkawali Pasu-pasu bas Tuhan nari, jadi pergegeh tendi kami Guna ndalani wari-wari, si rehna bas Kam Tuhan nari Reff : Pasu-pasu dage o Tuhan, persembahen kami anakNdu Labo kapen enda metunggung, persembahen si nggo pepulung AjariNdu pe kami gelah min, tetap ngasup mere man Tuhan

Buaten lit kami o Bapa, gejapken kami Kam empuna Tanda ukur kami meriah, endesken kami baNdu Bapa Persembahen enda o Bapa, desken bunga ncole merimna Persembahen ateNdu ngena, bagelah akapNdu o Bapa. Reff :….

12. Pertoton persembahen ras syafaat

Persembahen ras gelah jabu tetap ertambahna erkeleng ate ras ndalanken si mehuli (ibabai sekalak Moria/Mamre)

Notoken Bangsa ras Negara bage pe gereja ras si turah i bas perpulungen (ibabai sekalak Mamre/KAKR/Permata)


32

Notoken tuan rumah ras gereja gelah tetap nehken kekelengen njagai diri ras njagai kalak si deban la kena covid 19 alu patuh nandangi protokoler kesehatan (ibabai sekalak serayan/Moria/Mamre)

13. Jabu si ndalanken kekelengen (bdk.Kua. 17: 17 ; 19:8) L Teman tetap encidahken atena keleng P Kai gunana sekalak senina adi labo ikut nggejabken kiniseran? L Ise ngayaki pemeteh ikelengina kap dirina P Ise si nginget kai si ipelajarina jumpa kap ia si mehulina

14. Rende KEE No. 327:1,3 Tuhan Dibata sinemani, seh jumpa ka kita pagi IA tetap singkawali, Tuhan Dibata si nemani Reff : Seh jumpa kita jumpa ka, Dibata si pejumpa kita Seh jumpa kita jumpa ka, Dibata si pejumpa kita

Tuhan Dibata si nemani, i bas ndele tah pe susah IA m’reken dalan pulah, Tuhan Dibata si nemani Reff :….

15. Pertoton Tuhan 16. Pasu-pasu

L Ipasu-pasu janah ikawali Dibata kita (kam), siang ayo Dibata ersinalsal i babonta (ndu), janah melias ateNa ngenehen kita (kam), itatap Dibata ku kita (kam), janah malem ateta (ndu) ibahanNa, Amin.

III. Diskusi ras Aksi 1. Kai saja si pernah igejabken dingen tetap inget bapa, nande, anak-anak

kekelengen arah isi jabuna si erbanca meriah kel iakapna? 2. Sidiskusiken dingen kai banci sibahan aksi jabu/PJJ sektorta nehken

kekelengen i bas kecibal pandemi covid 19 enda man kalak si deban/anggota sektorta? Ump. Aksi mereken Masker/mereken sembako/rsd si banci silakoken dingen banci mis sidalanken.

Pdt. Karvintaria br Ginting, S.Th.,M.M


33

PEKAN KEBAKTIN KELUARGA GBKP WARI/BERNGI V

KAMIS, 19 NOPEMBER 2020

I. PERSIKAPEN





II. KEBAKTIN 1. Kata Penaruh : Senina ras turang, i bas Pekan Kebaktin Keluarga tahun 2020 enda enggo kita

ibabai gelah ngasup ngalaken kerina keadaan erkiteken kuasa Kristus. I bas wari/berngi pelimaken enda, ibabai kita gelah tetap erdahin i bas kerina dampar kegeluhenta. La saja i bas situasi si tenang kita erdahin tapi pe kune lit bencana kita tetap erdahin. Erdahin alu “kreatif” makeken teknologi informasi. Alu bage teridah ketutusenta erdahin jenari tek kita pasu-pasu Dibata pe tetap maler man banta.

Mari dage arah kebaktinta enda sipehaga Tuhan, siendesken dirinta jadi

persembahen si nggeluh. Pengarapenta gelah kebaktin enda banci erdalin

alu mehuli dingen sitaruhken persuruhen Tuhan guna mabai kebaktin enda alu pertoton.

Ertoto


34

Rende : KEE No. 113:2 (Perpulungen tedis, pengendesen kitab man si maba kebaktin)

Gegeh ni dagingku, ipesuang Kam Ku dahi dahinku, wari enda ka Pasu-pasu aku, ras dagingku pe Natap min matangku lalap baNdu pe

2. Votum/Salam L Kebaktin enda ibenaken i bas gelar Dibata Bapa, AnakNa Jesus Kristus

ras Kesah Si Badia. Penampat man banta (bandu) reh i bas Jahwe nari sinepa langit ras doni, singkawali perberkat ras permulihta (ndu) genduari nari seh rasa lalap. Amin.

Perp Amin ... Amin ... Amin (iendeken)

3. Invocatio : Terpaksa igegehindu erdahin alu curcur panasndu, gelah taneh enda banci mereken asil man bandu, seh mulih ka kam ku taneh, sabab i bas taneh nari kam ijadiken (Kej. 3:19a)

Erpalasken Kata Dibata enda, sipuji IA alu ras kita rende : KEE No. 262:1-2 Doni enda seh ulina, Tuhan si nepasa

Ras isina pe k’rina, b’rekenNa banta Reff : Sehken bujur dage baNa, arah k’rina dampar g’luhta Sehken bujur dage baNa, arah k’rina dampar g’luhta

Taneh si mekapal enda, Tuhan si nembesa Kai pe mbue kap bassa, kuh banNa banta Reff : …

4. Puji-Pujin Man Tuhan (Perp. Kundul) L Tuhan erbahanca lau belin jadi kerah, ulu lau jadi taneh kerah P Gurun pasir isalihkenNa jadi tambak, taneh kerah isalihkenNa jadi ulu lau maler L Juma ierdangi janah isuan anggur, simereken ulih si seh kel buena P Ipasu-pasu Tuhan bangsaNa gelah ertuah, dingen asuh-asuhenna tetap reh buena. L Sipuji Tuhan alu rende : KEE No. 255:1,4

Talenta sinib’reken Dibatanta, jadi min erlipat ganda Tutus ateta ndahiken dahinNa, amin pe mberat tapina ermulia


35

Reff : Kalak si malang nandangi Tuhan, la kap nggit nimbak labo ‘nggit nogan Maka dahiken ‘lah alu tutus, ola lakoken alu mekarus

Ulihna lit kap bas Tuhan Dibata, mulia rikut mehaga Adi perkisat la kel lit gunana, jelma mejingkat maka ngena ateNa Reff : …

5. Pengakun Kerna Kinilangasupen Erdahin Alu Tutus

L Nina Jesus, “BapangKu erdahin kap lalap, e maka Aku pe arus erdahin

P (Ngendeken: KEE No. 76:1)

KulebeNdu Dibatangku, aku nembah erjimpuh pe

Dengkehkenlah min totonku, nen iluhku mambur e

L La ipan kami nakan kalak la nggalar. Tapi erdahin kami alu latih.

Erdahin kami suari ras berngi gelah ola lit i tengah-tengahndu si

mberat iakapna erkiteken kami.

P (Ngendeken: KEE No. 76:2)

Kuukuri me lagungku, dosa nari krina pe Nggo terbuang wari-wari, la kupergunaken pe

6. Berita Pengalemi Dosa (Perp. Tedis) L Dibatanta, Dibata si perkuah, la itaktakiNa dosanta, tetap IA ncidahken

keleng ateNa. Man kalak si ngakuken salah lepakNa isehkenNa pengalemi dosa, nina i bas Jesaya 1:18-19 ‘Marilah maka si dungi cakapta enda. Kam enggo erkubang-kubang ibahan dosa tapi Kuperidi kam maka bersih bagi salju. Aminna gia erkiteken dosandu kam enggo mbiring bagi tengguang, mulihi kam jadi mbentar bagi kapas. Adi kam erkemalangen man bangKu, ipanndu me kai si mehuli ulih tanehndu enda’.

Si puji Tuhan alu ngendeken: KEE No. 209:4-5

Erbage-bage pemere, man banta kerina Tujunna sada me kepe, terpuji Dibata Ersada ukur me jine, o Kristen japa pe Anem melala ringring pe, sada kula kepe


36

Kerina daten pemere, dat pasu-pasu pe Mejingkat k’rina min dage, ndahiken dahin e Meteruk ukur k’rinalah, em pedah Tuhan

Em jadi man ikutenlah, i bas kelengNa e

7. Ngoge Kata Dibata (iogeken si mada jabu) (Perp. Kundul) L Kata Dibata si jadi ogen pemena i bas wari/berngi enda eme i bas Kuan-Kuanen 10:3-5 L Ketuahen kalak si megiken Kata Dibata dingen si makekenca i bas geluhna si teptep wari. Haleluya! P Haleluya....Haleluya.....Haleluya (iendeken)

8. Renungen (ibenai ras iujungi alu pertoton) Kotbah : Perbahanen Rasul-Rasul 18:1-4 tema : Jabu Si Tetap Erdahin

Dibata si isembah kalak Kristen eme Dibata si erdahin (aktif). Emaka manusia si itepa Dibata rikutken tempasNa arus erdahin jadi teman Dibata ngusahai dingen pekena-kena doni enda. Arah erdahin manusia erbakti man Dibata. Dingen arah dahin, manusia ngaloken pemere Dibata. Erkiteken maler pemere Dibata kempak manusia si erdahin alu tutus emaka banci ia ngelai kalak si deban. Enda me tempas jabu si pentar erdandanken malang man Dibata. I bas litna kepentaren e, anem uga pa pe situasi, manusia tetap erdahin. Manusia kreatif make peralaten umpamana teknologi informasi guna ndahiken dahin gelah tetap rulih.

Akuila ras Persila eme sada jabu Kristen i bas abad pemena Masehi bagi si tersena i bas Pustaka si Badia Padan si Mbaru. Ia jumpa ras Paulus jenari seri pendahinna eme selaku tukang kemah (erbahan tenda). Jenari radu ras ia keliling meritaken Berita Si Meriah dingen jadi teman si ihamati Paulus. Akuila ras Persila erdahin alu tutus mpegegehi perpulungen si pemena. Gelar Akuila ras Persila lit piga-piga kali tersinget i bas Pustaka si Badia eme dua kali i bas surat rasul Paulus (Rm. 16:3; 1 Kor. 16:19), piga-piga kali i bas kitab Perbahanen Rasul-Rasul (Perb. 18:2;18:18; 18:26) ras sada kali i bas kitab Timotius (2 Tim. 4:19). Akuila ras Persila eme Perberita Si Meriah keliling dingen pemimpin perpulungen i bas perpulungen-perpulungen si pajek ulih pelayanen Paulus. I bas surat Paulus kempak perpulungen Korinti, si itulisna tupung ia i Epesus, tersinget maka Akuila ras Persila pe ikut pindah ku Epesus. I bas kota enda pe Persila erdahin ngepkep perpulungen ras jabuna. I bas kitab Roma, Paulus ningetken maka Persila selaku pengepkep perpulungen si mehuli.

https://id.wikipedia.org/wiki/Kristen

https://id.wikipedia.org/wiki/Tenda

https://id.wikipedia.org/wiki/Priskila

https://id.wikipedia.org/wiki/Rasul

https://id.wikipedia.org/wiki/Paulus

https://id.wikipedia.org/wiki/Timotius

https://id.wikipedia.org/wiki/Efesus

https://id.wikipedia.org/wiki/Roma


37

Kenca nadingken Aten, lawes me Paulus ku Korinti, dingen jumpa ia ras Akuila bage pe ndeharana Persila, si asalna i Pontus nari. Ia mbaru reh i Italia nari erkiteken kaisar Klaudius mpedarat perintah maka kerina kalak Jahudi arus nadingken Roma. Perintah Kaisar Klaudius (41-54 M) enda icatat sejarahwan Suetonius: "Klaudius mpelawes kalak Jahudi ndarat i Roma nari, erdandanken lalap mpeturah kerusuhen, alu Chrestus sebage pemimpinna. Paulus kesilang i rumah Akuila ras Persila i bas serina pendahinna sebage tukang kemah. Kenca 1 tahun 6 bulan ras Paulus i Korinti, Persila ras Akuila ikut ras Paulus erlayar ku Siria.

Aminna gia pindah i Italia nari ku Korinti, Akuila ras Persila tetap ndahiken dahinna alu tutus. La ngadikenna dahinna aminna lit ganggun man bana eme ipelawes i Italia nari. Emaka ia la jadi tanggungen kalak si deban. Sebalikna ia banci ngelai kalak si deban alu nampati perpulungen. Teridah maka Akuila ras Persila tetap ndalanken orat nggeluh si mehuli selaku tinepa Dibata eme erdahin. I bas invocatio tersinget, terpaksa igegehindu erdahin alu curcur panasndu, gelah taneh enda banci mereken asil man bandu, seh mulih ka kam ku taneh, sabab i bas taneh nari kam ijadiken. Kata Dibata enda teridah alu payo idalanken Akuila ras Persila.

Pengalamen Paulus bage pe Akuila ras Persila, adi dahin idahiken alu tutus i bas erkemalangen man Dibata pasti rulih. Geluh lit i bas kecukupen. Kerina e banci jadi erkiteken pemere Dibata. I bas ogen Kuan-Kuanen 10:3-5 tersinget, kalak bujur la ipelepas Tuhan kelihen, kalak mejingkat kebayaken jadi ulihna dingen kalak pentar rani kap i bas paksana. Simpar tuhu ulih pendahinna pemere Tuhan emaka banci isampatina kalak si deban. Sebalikna isingetken sura-sura kalak jahat la ipebentas Tuhan, kalak malas jadi musil dingen man kemelanken adi lit kalak tunduh tupung paksa peranin. Geluhna jadi si nanggel man kalak si deban.

I bas tahun 2020 enda kita dekahen ndalani kegeluhenta i bas badai pandemi covid-19. Emaka enggo dekahen kita tading i rumah erdahin pe i rumah nari. Erdandanken si e kita iajari dingen ibabai kreatif makeken teknologi informasi. Contohna: erbinaga dingen sipasarken ulih dahinta (juma, asuh-asuhen, usaha ras si debanna) arah media sosial umpamana facebook ras Whatsapp. Pemaken media sosial enda mereken keuntungen selain murah i bas promosi tapi pe enterem si ngidahsa. Belang-belang doni enda banci ngidahsa. Dingen

https://id.wikipedia.org/wiki/Atena

https://id.wikipedia.org/wiki/Korintus

https://id.wikipedia.org/wiki/Italia

https://id.wikipedia.org/wiki/Claudius


https://id.wikipedia.org/wiki/Suetonius


https://id.wikipedia.org/wiki/Siria


38

kalak pe nukur binaganta banci arah media sosial e. Alu bage enggo murah i bas erbinaga ras nukur. Transaksi duitna pe arah bank. Alu bage la kita pulung-pulung i bas erbinaga ras nukur.

Tema Pekan Kebaktin Keluarga wari/berngi pelimaken enda eme: Jabu Si Tetap Erdahin. Tetap erdahin ertina erdahin alu tutus la ipengaruhi situasi ras inganta tading. Tujunta tetap erdahin i bas kerina situasi eme njaga ketahanen ekonomi, pangan, paken bage pe kerina keperlun jabu. Kerna si enda tetap perlu si lumbaken gelah tetap tercukupi keperlun jabunta. Kita la jadi beban man kalak si deban sebalikna kita banci nampati kalak si deban si kekurangen geluhna. Kita ngelai arah kiniliten jabunta. Soli Deo Gloria.

9. Pengakun Kiniteken (Perp. Tedis) Aku tek man Dibata Bapa si la ersibar kuasaNa, …….

10. Persembahen Pengataken Bujur (Perp. Kundul) a. Kata Dibata si jadi palas i bas kita nehken persembahen pengataken

bujur: Ngataken bujur e me persembahen si pehagaken Aku janah si patuh ngikutken Aku tentu Kukelini. (Msm. 50 : 23)

b. Rende : KEE No. 315:1,5

Simpar tuhu pemereNdu, jujurkenNdu kap man bangku Ermengkah kal me ukurku, la ‘ku lupa lias ateNdu Reff : AlokenNdu o Tuhanku, persembahen anakNdu Usekenlah pasu-pasu, peteguhi perpulungenNdu

Si tading bas kami enda, banNdu lah erlipat ganda Kami k’rina reh ngasupna, ndahiken dahin si mulia Reff : …

c. Ertoto Kerna Persembahan ras Pertoton Sapaat Topik Pertoton: (ibabai Pengurus PJJ, Pengurus Mamre Sektor ras Pengurus Moria Sektor) 1. Kerna Persembahen 2. Kerna jabu bage pe pendahin ngawan perpulungen gelah reh kreatifna. 3. Kerna aron, si erdahin i bas toko, pabrik ras si debanna 4. Kerna usaha ras pengusaha si lit i bas Indonesia enda. 5. Kerna tuan/nyonya rumah ras si turah i bas perpulungen.


39

11. Perpadanen ras Dibata : (Perp. tedis) L Tuhan erngena ate man kalak si erdahin alu tutus. P Kudahiken alu tutus pendahin si enggo ibereken Tuhan man bangku L I bas jaman teknologi informasi enda erdahinlah kam alu kreatif. P Reh kreatifna aku erdahin maka reh litna ulihna eme pemere Dibata.

Amin. L Guna peteguhi perpadanenta, ras kita rende KEE No. 68:1,3

DahinNdu si mbelin Tuhan, kerajang kami pe Ban Kam si mada kerajan, la masap lalap e Tapina bagi page me, gelah ersuli turah pe E mate kap benih lebe, bage pe kami k’rina nge Nggit mate pe, lah turah page nge Di kam bagi benih kap e, kuburen dungna kin Lang kegeluhen lalap nge, k’rajangku me pagin Min suruh aku japa pe, m’ritaken kegeluhen e Lah ise pe ngakuken me, di tek de atan me kepe Nggit kami pe, m’ritaken bana e

12. Pertoton Tuhan

13. Pemasu-masun L Tetaplah nggeluh i bas kemulian Dibata maka ngasup kita (kam) tetap erdahin. Guna jadi gegehta (ndu), alokenlah pasu-pasu idur Dibata nari: Dibata si mada perkuah ate, si enggo nenahken kita (kam) ku kemulianNa si rasa lalap i bas Kristus, njadiken kita (kam) serta, tetap, megegeh dingen paguh. IA nge si mada kemulian seh rasa lalap. Amin. P Amin... Amin...Amin (Iendeken)

III. DISKUSI: 1. Turikenlah kai iakapndu alasenna maka Dibata mereken keperlun

geluhta arah pendahinta! 2. Daftarken tanda-tanda kalak si erdahin alu kreatif!

Pdt. Christopher Sinulingga, M.Th.


40

PEKAN KEBAKTIN KELUARGA GBKP WARI/BERNGI VI

JUMAT, 20 NOPEMBER 2020

I. PERSIKAPEN BENGKET KU BAS KEBAKTIN Adi Pekan Kebaktin Keluarga enda ilakoken i rumahta sekalak-sekalak

maka adi la serayan Tuhan (Pdt, Pt/Dk) si mbabaisa maka votum, salam ras pemasu-masun la padah sibelasken.



Siusahaken maka anak-anakta pe terlibat i bas Kebaktinta

Kata Penaruh Ku Bas Kebaktin. Mejuah-juah man banta kerina kekelengen ni Tuhan. Malem ateta erkiteken Dibata tetap ngarak-ngarak perdalanen geluhta rikut ras kerina isi jabunta seh maka kita kerina lit i bas sehat-sehat ras mejuah-juah. Icukupi Dibata keperlun geluhta suari ras berngi. Tek kita maka Dibata tetap pekena-kena geluhta, lanai aru ateta nandangi geluhta si pepagi.

I bas wari/berngi si pe enemken Pekan Kebaktin Keluarganta, si jadi Tema-nta e me “Jabu Si Erbudaya”. Arah Tema enda kita ibabai gelah isi jabunta nggeluh jadi jabu si erkiniteken man Tuhan, ndalanken budaya kegeluhen si dame ras sangkep geluhta. Janah i bas tiap kerja-kerjanta, sigejabken Dibata erdahin ngkuhi kerjanta e. Alu bage, teridah i bas kita ndalanken erbage-bage kegiaten budayanta, kita naksiken nilai-nilai kekristenenta, janah gelar Tuhan Jesus pe terpuji. Guna menai Kebaktinta enda, mari ras kita ertoto.

Rende KEE No 205:1,2 (Perp. Tedis) Rehlah min o Tuhan sikap kami k’rina ersembah man baNdu jenda Nusurlah min Tuhan bahan sikap k’rina ukur kami pe badia O, Bapa, bre gelah daten pasu-pasu kami k’rina enda

Tuhan Dibatanta lit bas rumah enda, nembah kita k’rina baNa Alu kehamaten mungkuklah man baNa, kula, tendi pe kerina Aloken kataNa ras pasu-pasuNa, usekenNa banta. Ngendesken Perlengkapen Kebaktin


41

I. KEBAKTIN

1. Votum ras Salam :

L Kebaktin Pekan Keluarga wari/berngi si peenemken enda i benaken i bas gelar Dibata Bapa, AnakNa Jesus Kristus ras Kesah Si Badia. Perkuah ate ras dame i bas Dibata Bapa ras i bas Tuhan Jesus Kristus nari, i bas kerembaken Kesah Si Badia ras kita (kam) kerina gelah. Amin. P Amin…Amin…Amin... (Iendeken)

2. Invocatio : “Asangken kerina teman-temanku kalak Jahudi si sebekbek

ras aku, lebihen aku i bas ndalanken agama Jahudi. Tutusen ateku

nandangi adat-istiadat si isuratken nininta asangken ia kerina,” (Gal.

1:14). Erpalasken kata enda, mari sipuji Tuhan arah KEE No. 248:4

Adina Dibata enggo masu-masu, si engkawalisa i bas perjabun Perdalinen nggeluh malem kal atendu, rembak ras Dibata la kam kemalun Reff : Si ajar-ajaren radu ras si keleng-kelengen Si sampat-sampaten, sada ukur maba kegeluhen Tengah-tengah jabu, Tuhan Jesus jadi persukuten Gelah min pepagi, perjabunndu banci man usihen

------------------------Perp. Kundul------------------------

3. Orat Jabu Si Erbudaya

L Malem kal ateta perban Tuhanta Jesus makeken budaya manusia jadi inganNa ncidahken kuasa ras keleng ateNa man banta.

P Bujur Tuhan, ergakenNdu budaya kami jadi inganNdu ncidahken kuasa ras keleng ateNdu si mbelin man kami.

L Jesus ngajari kita gelah i bas kita ndalanken erbage-bage dampar budayanta, teridah min tetap nilai-nilai kinitekenta man Tuhan Jesus.

P Bujur o Tuhan Dibata kami. Tuhu kal sura-suraNdu e. Sabab arah teridah kiniteken kami man bandu tupung kami ngelakoken kegiaten budaya kami, reh teremna me kalak muji Kam i bas kegeluhenna. O Tuhan ajariNdu kal kami ras isi jabu kami, gelah kami nggeluh bagi si ngena ateNdu i bas ndalanken adat-istiadat kami.

L+P Terpujilah Kam o Tuhan Jesus. Amin.


42

4. Erpalasken kata enda, mari tole si puji Tuhan arah KEE No. 424:1,2:

Ipuji kami Kam Dibata Si Mbelin, alu ende-enden si meriah Suari ras berngi kawali kami min, segelah la celus bas percuban Reff: Sangap kap kalak si ‘rnalem baNdu e, Daten tuah ras kesenangen pe (2x) Dibata sajalah tetap si man pujin, endeskenlah g’luhta man baNa min Tetap IA si mperdiateken kita min, kelengNa man banta la erkerin Reff. Sangap kap kalak.....

5. Ngoge Kata Dibata : Kejadin 29:6-30 L Ketuahen kalak si megiken Kata Dibata dingen si makekenca i bas geluhna si teptep wari. Haleluya. P Haleluya.....Haleluya.....Haleluya..... (Iendeken)

6. Kotbah : Johanes 2:1-12 ; TEMA: “Jabu Si Erbudaya”

Koentjaraningrat mbagi kebudayaan ku bas 3 wujud e me (a) ideas (sistem ide) misalna norma (norma sosial, sopan santun), adat istiadat, bahasa, agama, ras secara tertulis lit i bas hukum adat, (b) activities (sistem aktivitas) misalna upacara adat nereh empo, si mate-mate, mengket rumah, ras si debanna ras (c) artifacts (sistem artefak) misalna Rumah Si Waluh Jabu, Uis Karo, tumbuk lada, lesung, kampil, ras seterusna.

Jadi adi ngerana kita erpalasken Tema Pekan Kebaktin Keluarga berngi enda e me “Jabu si Erbudaya”, tentu 3 wujud budaya enda jadi perhatianta ras-ras. Tentu saja si hubungken ras kinitekenta man Tuhan Jesus. Alu gendek kata, i bas wari/berngi enda kita ibabai gelah nggeluh selaku kalak si berbudaya luhur si iterangi alu nilai-nilai kinitekenta man Tuhan Jesus. Nilai-nilai Kristiani ras budayanta si mehuli ras luhur e teridah min i bas geluhta teptep wari. E maka terdauhen mari sipepayo alu anjar-anjar kai nina Pustaka Si Badia kerna budaya.

Erpalasken bahan Kotbahta, i bas ayat 11 isuratken: “IcidahkenNa kuasaNa si mbelin e maka ajar-ajarNa tek man baNa.” Adi i bas bahasa Indonesia i je tertulis: “...dan dengan itu IA telah menyatakan kemuliaanNya.” Ertina, Jesus ncidahken kuasaNa si mbelin (kemuliaanNya) i bas sada pesta erdemu bayu. Kerja erdemu bayu i kuta Kana me jadi ingan Jesus pemenana erban tanda


43

sengget (mujijat) gelah tek ajar-ajar e man Jesus. Jesus ngubah lau si biasa jadi anggur si ntebu. I bas ayat 10 ituriken reaksi sukut man si empo nina: “Tapi kam seh asa genduari lit i bas kam anggur si mehulina.” Sipepayo kata anggur si mehulina. Tentu saja anggur si mehulina enda banci jadi erkiteken kuasa Dibata si icidahken Jesus i bas salah sada kegiaten budaya (adat) kalak Jahudi.

Tanda sengget lau salih jadi anggur enda labo banci jadi bage-bage saja. Lit proses si terjadi e me: Nande Jesus ikut bas kerja e. Jesus pe ras ajar-ajarNa iundang ku kerja e. Situasi: lau anggur keri. Ituriken nande Jesus keadaan e man Jesus. Nina Jesus “PaksangKu langa seh”. Ertina, kita arus sabar nimai Jesus

bertindak erpalasken katawari iakap Jesus pas IA bertindak. Labo perlu si atur-atur Jesus, si penting, turiken keadaanta man baNa.

Nina nande Jesus man serayan: “Ikutken kai si ikatakenNa.” Nina Jesus, isi guci e alu lau seh dem, e maka idemi serayan ndai; jaruk lau

e sitik jenari baba man sukut kerja e; e maka i baba kalak ndai lau e man sukut kerja e, jenari inanamina lau si enggo salih jadi anggur e.

Enda me si idah proses jadina tanda sengget lau salih jadi anggur. Si menarik, tanda sengget e melibatken nande Jesus, serayan kerja e, sukut si ngenanami (necap) anggur e ras Jesus sendiri. Ras tentu saja ajar-ajar Jesus si naksiken peristiwa e terjadi. Janah unsur si penting: tenahken Jesus i bas dahinta (kerjanta), turiken keadanta, timai IA bertindak, begiken ras ikutken kataNa. Ulihna jelas, i bas kerja-kerjanta lanai lit si kurang, bahkan lebih asa si iarapken kita banci ibereken Jesus man banta, termasuk i bas dunia budaya (non keagamaan) sekali pe. Kuasa Jesus teridah i bas dahinta teptep wari. Mujijat Jesus labo terbatas terjeng i bas Rumah Pertoton ngenca. Kuasa Jesus banci teridah i ja pa pe sue ras sura-sura Jesus sendiri. Penungkunenna, tek nge kita entah lang?

I bas bahan Ogenta ituriken me kerna perjumpan Jakup ras mamana Laban bage pe Rahel. Laban e me turang Ribka, nande Jakub, tutur Jakup ermama man Laban. Perjumpan enda jadi erkiteken isuruh Isak kin si Jakup ndarami si man emponna arah keluarga kalimbubuna si Laban (Kej. 28:1-5). Sada


44

keriahen kal man Laban jumpa ia ras beberena si Jakup. Enda si idah i bas ayat 13: Kenca ibegi Laban kerna beberena Jakup, kiam ia njumpaisa, idakepna, iemaina, jenari ibabana ku rumah.” Tentu arah perjumpan Jakup ras jabu mamana Laban erbahanca reh teguhna kiniersadan antara jabu Ishak ras Laban. I bas bahan Invocatio ituriken kerna Paulus sekalak Rasul si tutus ersembah man Tuhan bage pe i bas ndalanken adat-istiadat si isuratken tua-tua kalak Jahudi. Paulus pe labo ia anti nandangi adat-sitiadat si ipake i bas kegeluhen sosial kalak Jahudi. Justru Paulus masuk ku bas konteks budaya Jahudi guna nehken Berita Si Meriah man kalak Jahudi. Jadi arah bahan Kotbah, Ogen ras Invocatio banci siidah piga-piga poin penting, e me: Pustaka Si Badia labo anti budaya lokal. Justru i bas Pustaka Si Badia banci

si idah konteks budaya Jahudi ras Junani jadi ingan (sarana) Kata Dibata i sebarluasken. Budaya jadi ingan Dibata nuanken ras peturah KataNa man kita manusia. Jesus sendiri make “roti” ras “anggur” si biasa ipan ras i inem kalak Jahudi guna ngingetken kita kerna daging ras dareh Jesus. Jesus labo mela ras nganggap rendah kulaNa ras darehNa si Badia isimbolken (igambarken) alu roti ras anggur si kin buah tangan (budaya) kalak Jahudi. Justru ipake Jesus istilah-istilah ras pe kebiasan kalak si megiken kataNa (termasuk cakap/bahasa lokal) gelah kerina si megiken kataNa ngasup ngalokenca alu menukah. Kune ndai Jesus tubuh ras erdahin i Taneh Karo, kai nge akapndu i ban Jesus jadi simbol daging ras darehNa? Mela nge akapndu Jesus make istilah ras simbol-simbol si lit i bas budayanta?

Jesus hadir labo kepe terjeng ku bas Rumah Pertoton ngenca, tapi pe ku bas kerja-kerjanta si erbage-bage bentukna. Gelah Jesus banci terlibat ncidahken kuasaNa i bas kerja-kerjanta, tenahken Jesus reh, erdahin sue ras sura-suraNa, ras ikutken kataNa. Ula kari sitenahken Jesus sebatas pelengkap saja. Arusna jadi penentu mehuli entah la mehuli kerjanta e. Mari si puji ras si pehaga Tuhan Jesus arah kegiaten-kegiaten budayanta.

Terlebih i bas kondisi pandemi Covid 19 ras Adaptasi Kebiasaan Baru enda, penting kal kita ngidah unsur penting (substansi) perdalanen adat baik i bas kerja meriah bage pe ceda ate. Entah enggo perlu kita rukur ras


45

mpersada arih (BPMR ras pengetua adat) i bas sada ingan/wilayah maka labo teremna jelma menentuken suksesna kerja-kerjanta e. Tapi kerehen Jesus ras Rakut Si Telu (Sukut, Kalimbubu, Anak Beru), perkade-kaden 12+1. Tegun si arus (batangna) enggo je pulung. Adi undangen arah Runggun gereja, PJJ, sanga pemasu-masun i gereja si cidahken persadanta selaku sada rarasen/perpulungen. Adi teman meriah sistem perwakilen pe entah enggo me banci? Prinsipna uga maka payo ras teng-teng i bas situasi gundari, menahang ka min iakap sukut si erkerja, ulanai min lit si ngutang gelah banci erbahan kerja, Protokol Kesehaten pe si lakoken. Si penting me inti adat idalanken (isaksiken sangkep nggeluh, pedalan utang adat, teridah keleng ate ras keriahenta, ula si karusken, sehat ka kita janah terutama gelar Tuhan si permuliaken.

Bagi Ishak nuruh Jakup ku rumah Laban mamana, bage me pe kita mabai anak jabunta nandai ras mpedeher anak jabunta ku jabu kalimbubu. Janah pihak kalimbubu pe ermeriah ukur ka ngalo-ngalo beberena entah silihna entah turangna. Mpeteguhi hubungen keluarga sada dareh e penting kal, terlepas i bas soal tumbuk erjabu entah lang anakta ras beberenta entah pe anakta ras permenta. Hubungenta si sada dareh e tetap arus ersada ras sijagan pekepar.

Jadilah kita kalak Kristen si tutus ersembah man Tuhan Jesus bage pe ratur ka i bas pedalan adat bagi si isingetken Paulus i bas invocatio-nta. Ula kari i ja pa pe banggong. Jaga kal ula min jadi erkiniteken pe banggong, erbudaya pe muat enggona.

Jabu si erbudaya e me jabu si carana erkiniteken labo petembil ras budaya si ibabana. Kinitekenna teridah i bas ertanggung jabab selaku Anak Beru, lanai man legin, tepat waktu ia reh ku kerja anak beruna perban ietehna ia selaku Kalimbubu. Bage pe selaku Sukut, Sembuyak, Senina, isampatina rusur dahin seninana, pepayona ja si kurangna gelah ula kemelan tugun seninaku e, nina rusur i bas pusuhna.

Tambah si e, jabu si erbudaya teridah i bas ia ngergaken cakap Karo, bangga selaku kalak Karo, melestariken budaya Karo, kuliner Karo, Uis Karo, Rumah Adat, rsd. Salah sada penanda identitas suku e me pemaken ras pengembangen bahasa suku e sendiri. Guna meteh ia kalak Karo teridah i bas beluh cakap Karo. Mehuli nge beluh anakta bahasa Indonesia entah bahasa asing. Tapi inget, kade-kadena teremen meteh cakap Karo.


46

Bahasa jadi sarana kita menjalin relasi sada ras si debanna. Adi jumpa ras kalak Karo, pake cakap Karo. Adi jumpa ras kalak si meteh bahasa Indonesia ngenca, pake bahasa Indonesia. Adi jumpa ras kalak i bas bangsa si deban pake bahasa Inggris. Labo lit gunana kita erbahasa Inggris man nini Ribu entah nini Karo si cakap Karo ngenca ietehna. Adi siterusken, nandangi tuk-tuk belona e nge seh man banta.

Gerejanta GBKP enda pe si idah uga ngergai ras makeken budaya Karo jadi alat mpebarken Berita Si Meriah. Enggo lit Pustaka Si Badia i bas cakap Karo, Kitab Ende-Enden alu cakap Karo bahkan melala ka alu irama (nuansa irama Karo), logo gerejanta GBKP pe gambar Rumah Adat Karo, ras si debanna. Enda labo kebetulen. Tapi erpalasken ulih pergumulan teologis ras kontekstual si sembaba ras “dareh”ta (budayanta). Alu bage reh menukahna siakap ngantusi sura-sura Dibata i bas kegeluhen keseharianta.

Terlebih i bas tahun 2021, gerejanta GBKP mengketi Tahun Inovasi ras pelayanen intergenerasi. Sisikapken anak-anak jabunta nandai mamana, mamina, bibina, bengkilana, bulangna, ninina, senina bapana/nandena, adat-istiadatta ras kekayaan budayanta ras orat nggeluh si lit i bas budayanta. Bage pe tentuna pemeteh ras kebeluhen si deban sue ras perkembangen jaman. Bage pe peturah kesadaren man generasinta berikutna erlajar arah suku bangsa si melestariken bahasa sukuna ras kekayaan budayana misalna Jepang, Korea Selatan, Tiongkok (Cina), Israel, ras si debanna teridah ia kuat njagai ras ngembangken warisen budayana, tapi tetap jadi negara si maju secara teknologi bage pe ekonomi. Contoh konkrit i Kota Siantar, enterem kal senina turangta belatarbelakang Tionghoa ndayai pangsit, cap cai, ifumie. Kuliner arah kutana ndube e jadi usahana. Antri ka kita nukursa. Uga kita berinovasi kerna kuliner Karo? Perlu si kembangken kuliner Karo secara kreatif, bage pe uis Karo jadi model baju si terkenal secara nasional bage pe internasional. Contohna Batik Solo, batik Jogya ras si debanna enggo jadi warisen Jawa si menguatken identitas Jawa sekaligus jadi “lumbung ekonomi.” Tentu potensi ras peluang e lit bas kita. Mari berinovasi, salah sada i bas makeken kekayaan budayanta si meherga si enggo ibereken Dibata man banta. Jadilah Jabu Si Erbudaya ras Erkiniteken man Tuhan Jesus. Amin.

7. Pengakun Kiniteken (Perp. Tedis)


47

8. Nehken Persembahen Pengataken Bujur (Perp. Kundul) a. Kata Dibata Kerna Persembahen : “Kalak si mpersembahken pengataken

bujur, ia nge si mpehaga kap Aku, janah man kalak si perdalinna La erpandangen, kucidahken kesangapen ni Dibata,” (Msm. 50:23).

b. Tupung si sehken persembahenta, si puji Tuhan arah KEE No. 385:1,2

Babalah persembahen si merimna, ku adep-adepen Dibatanta Babalah korban pujin si mehaga, ku lebe altarNa si Badia G’lah tetap b’reNa pasu-pasuNa, man k’rina manusia G’lah tetap b’reNa pasu-pasuNa, terpuji gelar Tuhan

Babalah persembahen si jilena, ku rumah Dibata si perkuah Babalah korban pujin si merimna, ku adep-adepen si erkuasa G’lah tetap b’reNa keleng ateNa, ras lias ateNa banta G’lah tetap b’reNa pasu-pasuNa, segedang-gedang g’luhta

c. Pertoton Persembahen ras Syafaat

Persembahen. Gelah jabunta jadi jabu si erkiniteken ras erbudaya. Ngasup kita ngelakoken kegiaten adat meriah ukur entah ceda ate alu

bijaksana i bas suasana adaptasi kebiasaan baru enda. Hal si deban si turah i bas jabu bage pe i bas perpulungen.

9. Tekad Jabu Si Erbudaya (Perp. Tedis)

L Terpujilah Tuhan si enggo mereken kebudayan man banta kerina. E maka si pake budayanta jadi perkakasta guna muji Tuhan.

P Mulai wari enda, reh tutus ateku ersembah man bandu Tuhan gelah reh ngasupna aku mpehaga Tuhan arah adat-istiadat kami.

L Mari si puji Tuhan alu make cakapta bage pe alat musik si lit i bas kita. P Ku puji me Kam o Tuhan Si Badia alu make cakap Karo ras alat musik si

lit bas kami. Sabab ngena ateNdu ende-enden pujin kami aminna pe ibelasken kami alu cakap kami jine.

L Senina ras turang, tenahkenlah rusur Jesus reh ku bas kerja-kerjanta sabab e kap si ngena ateNa.

P Meriah kal ukur kami nenahken Kam o Tuhan Jesus gelah Kam reh ku kerja-kerja kami. Sabab tek kal kami kerehenNdu e erbahanca erlayas ras mehuli me si kerajangen kami.


48

L Dibata nuruh kita gelah mpeteguhi hubungen perkade-kadenta ras sangkep nggeluhta kerina.

P Ue Tuhan. Nggit kami ngelakokenca. Mulai sendah sialem-alemen salah kami ras siajar-ajaren kami i bas sangkep nggeluh kami. Sabab e me sura-suraNdu Tuhan. Arah kami ersada kerina, i je me maka ipuji kami gelarNdu si mbelin e.

L+P Amin.

10. Rende KEE No. 255:1,3 Talenta si ni breken Dibatanta, jadi min erlipat ganda Tutus ateta ndahiken dahinNa, amin pe mberat tapina ermulia Reff : Kalak si malang nandangi Tuhan, La kap nggit nimbak labo nggit nogan Maka dahikenlah alu tutus, ola lakoken alu mekarus

Ersadalah min arihta kerina, make kata ras pedahNa Gelar ni Tuhan ‘lah tetap mulia, i je me t’ridah i bas lagu langkahta Reff. Kalak si malang nandangi Tuhan.....

11. Pertoton Tuhan 12. Pemasu-masun

Mulihlah alu dame ras mejuah-juah, aloken pasu-pasu idur Dibata nari: “Ipasu-pasu janah ikawali Dibata kita (kam), siang ayo Dibata ersinalsal ibabota (ndu), janah melias ateNa ngenehen kam kita (kam). Itatap Dibata ku kita (kam), janah malem ateta (ndu) ibahanNa. Amin.

Ialoi Perpulungen: Amin…Amin…Amin… (Iendeken).

DISKUSI 1. Makna kai nge si banci si dat arah kejadin Kerja Erdemu Bayu i Kuta Kana? 2. Uga nge siakap si mehulina si lakoken pelaksanan adat meriah ukur bage

pe ceda ate i bas masa Adaptasi Kebiasaan Baru enda gelah teridah jabunta e me jabu sierbudaya?

Pdt. Jekson Barus, M.Th.


49

PEKAN KEBAKTIN KELUARGA GBKP WARI/BERNGI VII

SABTU, 21 NOPEMBER 2020

A. PERSIKAPEN





B. KEBAKTIN

Kata Penaruh ku Bas Kebaktin (Ibabai Serayan Tuhan/Runggun Gereja)

Turang ras senina si ikelengi Tuhan bage pe si ikelengi kami.

I bas lias ras keleng ate Tuhan maka enggo terlaksana Pekan Kebaktin Keluarga GBKP tahun 2020 enda wari/berngi I – VI alu mehuli guna kemulian Tuhan. Pekan Kebaktin Keluarga GBKP enda jadi sada kesempaten man banta guna njadiken jabunta jadi “JABU SI PAGUH ERKITEKEN KUASA KRISTUS (Pil. 4:13)” gia pe Covid 19 tetap denga man tengettenta kerinana.

Selaku jabu Kristen tek kita maka Dibata njadiken jabu e jadi inganta lako ncidahken biakNa si badia e maka idilo Dibata kita kerina guna ikut njagai ras mpekena-kena doni enda alu tetap “Ersembah I Bas Jabu”, janah ulihna maka jabunta e metunggung ikataken selaku “Jabu Si Mejuah-Juah” secara kula bage pe pertendin. Erkiteken si e kerina isi jabu ipengasupNa lako “Nehken Keleng Ate Ndalanken Si Mehuli”. Dingen, jabu e pe terjemba lako jadi si kreatif ntah pe “Jabu Si Tetap Erdahin” bage


50

pe “Jabu Si Erbudaya”. I bas persadan si mehuli i tengah-tengah jabunta guna nehken sura-sura Dibata alu penampat kuasaNa e maka marilah si ujungi Pekan Kebaktin Keluarga enda alu perayakenta maka jabunta ipetunggung Dibata lako jadi “Jabu Si Maba Dame” terlebih-lebih pe i bas masa Advent ras Natal. Mari dage si benaken Kebaktin ta enda alu perlebe ras kita kerina ertoto.. Rende : KEE GBKP No. 124 : 2 (Perp. Tedis)

Senang me kap si ’rjabu sada arih, pehaga Tuhan peratenNa ras Mehuli kal ’di ise pe la dalih, berkat ku Minggu ’lah ertoto ras ’Di kebiaken gel-gel banci salih, ’di pengerana reh hamatna pe Bas kehamaten labo ’rlatih-latih, ipasu-pasu Tuhan me kepe.

Votum - Salam L Pekan Kebaktin Keluarga GBKP wari/berngi sipepituken enda ibenaken i

bas gelar Dibata Bapa si njadiken jabu kalak si tek, i bas gelar AnakNa Jesus Kristus si reh ku doni enda lako maba dame dingen mperdameken, ras i bas gelar Kesah Si Badia si tetap negu-negu jabu kalak si tek alu kuasaNa e.

Perkuah ate ras dame i bas Dibata Bapa, AnakNa Jesus Kristus ras kerembaken Kesah Si Badia, ras kita (kam) kerina gelah. Amin.

P Amin..... Amin..... Amin..... (Iendeken)

Berita Kerna Perbahanen Ras Sura-sura Dibata (Invocatio) L Juda me sincikep tungkat kinirajan, kesusurenna erkuasa seh rasa lalap,

bangsa-bangsa maba persembahen man bana, nembah alu erkemalangen i lebe-lebena (Kej. 49:10).

Erpalasken Kata Dibata enda, sipuji IA alu ras kita ngendeken : KEE GBKP No. 249:1, 5

Ajar aku o Tuhanku, make kata ras pedahNdu Kueteh payo ras sentudu, kuikutken bas geluhku Reff : Si ngikut pedah Dibata, daten me kerembakenNa

Pedah kata tangkas k’rina, em jadi gelementa

Mata ukur nare baNa, gelah peratenNa siangka Adi g’luhta ikepkepNa, tentu malem kal ateta Reff : …


51

Kecibal Jabu Si Maba Dame (Kuan-kuanen 15:16-21) (Perp. Kundul) L Jadi sada pertenget man jabu-jabunta kerina maka i bas kinata

kegeluhen e, madin musil tapi malang man TUHAN, asangken bayak tapi dem aru ate. La banci turah kedamen i je pe. Janah, madin man gulen saja ras si ikelengindu i bas jabu-jabundu, asangken man daging si entabeh tapi ras kalak si nembeh atendu.

Moria Kalak si perampang, peturah perjengilen kap, tapi kalak sabar maba dame.

Mamre Kalak malas i japa pe jumpa kesusahen; tapi kalak bujur la jumpa kiniseran.

Anak-anak Kami selaku anak pe nggejapken maka anak si pentar, malem ate bapa ibahan kami; tapi anak si lenge ertina la iergaken kami pe nande kami e.

L Kalak lenge meriah iakapna i bas kebodohenna, kalak pentar ilakokenna kai si benar e maka ulih kepentarenna e me kedamen i bas jabu.

Sipuji Tuhan alu ras kita ngendeken : KEE GBKP No. 248:4 Adina Dibata enggo masu-masu, si engkawalisa i bas perjabun Perdalin nggeluh malem kel atendu, rembak ras Dibata la kam kemalun Si ajar-ajaren, radu ras sikeleng-kelengen Si sampat-sampaten sada ukur maba kegeluhen Tengah-tengah jabu, Tuhan Yesus jadi persukuten Gelah min pepagi, perjabunndu banci man usihen

Jabu Si Maba Dame e Ndalanken Si Ngena Ate Dibata (Kuan-kuanen 24:3-6) L Kerina kita siikelengi Tuhan ….. Ingetlah, maka jabu e ipanteki erpalasken kepentaren ras pengertin.

Ulu kepentaren ras pengertin e Dibata kap. Perp. Bujur Tuhan i bas perbahanen kekelengenNdu e L Jabu si ipanteki Dibata e oratna min jadi jabu si maba dame dingen

alu pemeteh si ibereken Dibata e erbahanca maka bilik-bilikna kuh ras barang-barang si meherga ras mehuli.

Perp. Bujur Tuhan….. Sabab kalak pentar lebihen asangken kalak megegeh dingen pentingen kap pemeteh lit i bas jabu-jabu kami asangken gegeh.


52

L Dage, bahanlah lebe rencana si megermet ope denga jabunta bengket ku bas peperangen kegeluhen. Janah, ingetlah maka reh buena kalak si mereken pedah, reh belinna kemungkinen menang. Pedah Tuhan e si aloken me arah Pekan Kebaktin Keluarga nta enda. Amin

Berita kerna keriahen erkiteken bekas perbahanen Dibata (Perp. Tedis)

L Selaku persuruhen Dibata, aku nehken berita kerna keriahen erpalasken KataNa man banta (ndu) kerina kita (kam) si enggo ngelakoken si ngena ateNa i bas jabu-jabuna : Sangap kal kalak si malang man TUHAN, si nggeluh ngikutken kerina perentahNa. Ipanna me ulihna latih, sangap nggeluh, mehuli sikerajangenna. Ndeharana bali ras anggur si meramis buahna i bas rumahna, dingen anak-anakna bali ras tunas batang saitun i sekelewet mejana. Bage me pasu-pasu TUHAN, man kalak si malang man baNa, Amin. (Msm. 128 : 1 - 4).

Sipuji Tuhan erkiteken keriahen si enggo isehkenNa man banta : KEE GBKP No. 134:2

Sangana ersurak malekat ‘nterem, lit je Anak kitik entabeh medem BapaNa, nandeNa, meriah kepe. Ras kalak permakan si nembah i je Mari, mari ras min ku je. Ras kalak permakan si nembah ku je

Kata Dibata (Perp. Kundul) a. Ngoge Kata Dibata Bagin Si Pemena : Lukas 2 : 1 – 7 (iogeken

Bapa/nande) L Ketuahen me kalak si megiken kata Dibata dingen si makekenca i bas

kegeluhenna teptep wari. Haleluya. P Haleluya..... Haleluya..... Haleluya...... (Iendeken) b. Kotbah : Miha 5 : 2 – 5a Jabu Si Maba Dame (Advent ras Natal) : Miha 5 : 2 – 5a

I bas ende-enden Koor Moria se GBKP asum lit Kebaktin pemasu-masun perjabun, nina syairna bagenda :

O Tuhan, i jenda kami naruhken anakNdu kin ………. Gelah i bas jabuna gia dame rusur seh rasa lalap Dame rusur seh rasa lalap


53

Si jadi toto i je e me dame rusur seh rasa lalap janah jadi perayaken kerina jabu sabab labo lit kalak si njabuken bana lako ndatken kiniseran, perjengilen ras perjentiken. Dikune dame e enggo lit i bas jabu e maka jabu-jabu e pe iarapken banci maba dingen mbagiken dame ku jabu-jabu si debanna.

Bagin invocatio lit kap kawitenna ras Raja Daud si ndatken perkuah ate Dibata lako mbangun bangsa Israel, bangsa Dibata si mbelin dingen megegeh. Juda me sincikep tungkat kinirajan, kesusurenna erkuasa seh rasa lalap, bangsa-bangsa maba persembahen man bana, nembah alu erkemalangen i lebe-lebena jadi sada kinata i bas masa Daud jadi raja. Nubuaten enda igenepi i bas diri Jesus Kristus e, si igelari pe Mesias. Rikutken Ketangkasen 5:5 maka Jesus e kap ikataken Singa i bas suku Juda nari.

I bas ogen si pemena, Tuhan Dibata erdahin ncidahken kuasaNa man doni enda seh maka paksa si e Kaisar Agustus selaku kepala pemerentahen Roma, nuruh kerina rayat si lit i bas daerah kekuasanna gelah isensus. Kai si enggo isuratken ndube i bas Miha 5:2 (Indonesia : Mika 5:1) jadi me. Enda me sensus si pemena. Sanga si e, Kirenius me gubernur i Siria. E maka kerina kalak berkat ku kuta pengulihenna gelah isensus. Dibata ngaturken sejarah kegeluhen i bas doni e, atan pe kerna kai si iperentahken kaisar paksa si e. E maka, i bas pengaturen Dibata kedungenna Jusup pe ndalanken kerina si isurakenNa ndube seh Jesus tubuh arah jabu Jusup ras Maria e me sinursur Daud i bas kemeteruken ukurNa erkiteken kenca IA tubuh emaka ibaluti alu ampan dingen ipepedem i bas pelangkah.

Betlehem e me sada kota kitik sekitar 8 Km arah Jerusalem nari. Janah, Eprata e me gelar sada suku si tading i Betlehem e (bdk. Rut 1:2; 4:11; 1 Sam 17:12). Betlehem e kuta ketubuhen Daud, Raja Israel (1 Sam. 16:1). Amin gia Betlehem e kuta si kitikna, tapi i je nari ipekeke Dibata me sekalak si ngerajai Israel dingen irajaina me rayatna alu gegeh si reh i bas TUHAN nari dingen alu kemulian TUHAN Dibata jine. Rayatna nggeluh alu senang erkite-kiteken kerina bangsa i doni enda ngergaken ia tuhu-tuhu, janah IA maba dame. Enda me bagin si mbelinna dingen si pentingna i bas bagin Pustaka si Badia e, e me : IA REH MABA DAME.


54

Kalak Kristen ntah pe si tek man Kristus e iarapken kel banci njemba jabu si deban lako nggeluh erkemalangen man Tuhan. Kegeluhen erkemalangen man Dibata e jadi palas kesangapen kegeluhen bangsaNa (bdk. Msm. 128:1-6).

Adi i bas Padan si Ndekah ituriken me kerna nubuaten ketubuhen Jesus Kristus, e maka kita kerina pe genduari niarapken ersikap lako nuriken kerna erti Advent i bas jabu e me tetap ersikap ngaloken Raja Dame i bas jabu alu nggeluh maba dame man isi jabu bage pe sekelewetta. Siinget pe turi-turin perdalanen Jusup ras Maria ku Betlehem gelah isensus. Patuh ia duana dingen si e la terpulahi arah nubuaten Dibata (Mi. 5:2). La persoalen man Jusuf ras Maria kerna perdalanenna ku Betlehem erkiteken si e kerina ulih perbahanen Dibata. Erkiteken si e, man banta pe ijembaken segelah jabu-jabunta perpulungen Tuhan pe tetap min nggit patuh man Tuhan alu mereken si mehulina man Tuhan.

Jusup ras Maria la terjeng man Tuhan ngenca patuh tapi pe man pemerentah paksa si e, e me alu ikut sensus. Ngidah kondisi kegeluhenta paksa genduari enda, sehubungen pe ras Covid 19 iarapken maka kerina kita nggit ersikap ras nikapken diri guna ndalani kegeluhen alu aturen-aturen kegeluhen si mbaru guna kiniulinta kerinana. La terjeng si e saja, tapi pe kerina kita nggit min nggeluh alu sederhana (bdk. Kenca ketubuhen Jesus e ibaluti me IA alu ampan dingen itama i bas pelangkah.

Raduken ras si e, kerina kita pe iajuk lako nuduhken man doni enda erpalasken Miha 5:2-5a amin gia pe bangsa Dibata e kitik tapi arah bangsa Dibata e banci keke ngaruh si mbelin man doni enda segelah doni enda pe nggeluh i bas biak-biak kegeluhen si mbaru (sehubungen ras Covid-19 ndube ikataken e me adaptasi kebiasan baru).

Dage, hal si pentingna kal man turinken ta e me kerna jabu Kristen si maba dame erkiteken jabu e nggeluhken kegeluhenna i bas gegeh Tuhan dingen alu kemulian Tuhan Dibata. Gia pe pandemi Covid 19 lit denga tapi kita kerina aruslah jadi jabu si maba dame maka kedamen Tuhan e lit i bas bangsa ras Negara nta enda. Bahkan, Presidenta pernah ngataken maka kita arus erdame ras Virus Covid 19 enda alu tetap make masker, jaga jarak amanta, jaga immunitas ntah pe daya tahan tubuhta ras si debanna sue ras protokoler kesehaten. Sijagai dage dirinta dingen Dibata si masu-masu kita kerina, Amin.


55

Pengakun Kiniteken (Perp. Tedis)

Persembahen (Perp. Kundul) L Kata Dibata si jadi palas i bas kita ngataken bujur e me : “Bahanlah pengataken bujur jadi persembahen man Dibata, sehkenlah

kai si enggo ipadankenndu man si Meganjangna”. (Msm. 50 : 14) Tupung kita ngendesken persembahen, ras kita rende arah : KEE GBKP No. 115:1 Keriahen si mbelinna, si kuberitaken e Enggo tubuh si permakan, e me Tuhan Yesus e Pujilah min Dibata nta, ras dame dame dame man banta Dibata nta si erkuah ate man kita jelma e.

Pertoton Persembahen ras Pertoton Syafaat 1) Persembahen 2) Gelah jabunta jadi jabu si maba dame erkiteken kuasa si ibereken

Kristus 3) Persikapen mengketi Advent ras Natal i bas jabu ras gereja 4) Covid 19 la jadi penghalang i bas masa Advent ras Natal 5) Si turah i bas jabu

Perpadanen Man Dibata Maka Jabunta Tetap Maba Dame (Perp. Tedis) L Tuhan Jesus e kap Raja Dame dingen i bas gelarNa kap maka jabu

e lit guna maba dame ku sekelewetna P Erpadan kami Tuhan, makeken jabu kami lako maba dame man

kerina jelma dingen man sekelewet kami. L I bas mpeteguhi perpadanenta man Dibata, sipuji dage IA alu

ngendeken : KEE GBKP No. 138:1, 2 Yesus Kam medem i bas nggala e, Raja mulia si bujur e Kam si mekuah so tek kalak e, bengket pusuhku ringan i je Bengket pusuhku ringan i je

Yesus inganNdu pelangkah kepe, Raja mulia si bujur e Si ngena ate si tek aku pe, bengket pusuhku, ringan i je Bengket pusuhku ringan i je

Pertoton Tuhan


56

Pengutusen Ras Pasu-pasu Dibata L Tetaplah jabundu nggeluh i bas dame maka ngasup kita (kam)

ndalanken tanggung jababta (ndu) selaku bapa, nande ras anak i bas keluarganta (ndu). Perulihenta (ndu) e me nggeluh i bas keluarga si dem kesangapen ras kemalemen ate. Guna mpeteguhi kita (kam), alokenlah pasu-pasu idur Dibata nari :

“Dibata, si mada perkuah ate, si enggo nenahken kita (kam) ku kemulianNa si rasa lalap i bas Kristus, njadiken kita (kam) serta, tetap megegeh dingen paguh. IA nge si mada kuasa seh rasa lalap.” Amin. (bdk. 1 Pet. 5:10-11)

P Amin..... Amin..... Amin..... (Iendeken) Diskusi/Aksi

Diskusikenlah kerna persikapen-persikapen kai si banci silakoken guna Advent ras Natal tahun 2020 enda sehubungen ras litna Covid-19 enda.

Bahanlah aksinta pribadi ntah pe jabu guna mendukung pelaksanaan Advent ras Natal jabu ras gerejanta.

Pdt. Agustinus Ginting Manik, M.Th.


57

LAKON PERSADAN SI BADIA MINGGU, 22 NOPEMBER 2020


58

ARON PENULIS BAHAN PEKAN KEBAKTIN KELUARGA GBKP TAHUN 2020

1. Pdt. Yunus Bangun, M.Th.

2. Pdt. Nurbety br Ginting, M.Th.

3. Pdt. Dicky A. Bangun, M.Th.

4. Pdt. Karvintaria br Ginting, S.Th., M.M

5. Pdt. Christopher Sinulingga, M.Th.

6. Pdt. Jekson Barus, M.Th.

7. Pdt. Agustinus Ginting Manik, M.Th.


59

LEMBAR SARAN :

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………


60

LEMBAR SARAN :

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………

…………………………………………………………………………………

CATATEN :

Adi lit saran ntah pe kritikenndu si sipatna guna mpehuliken ntah pe perbaiken Bahan Pekan Kebaktin Keluarga 2020 enda banci ikirimkenndu ku : PUSAT PEMBINAAN WARGA GEREJA (PPWG) GBKP ; JALAN NABUNG SURBAKTI NO : 2 ; KABANJAHE – SUMATERA UTARA 22115 (alamat email : [email protected])

Keluarga tahun enda. Amin gia i bas tahun enda erbage...

Documents

Transcript of Keluarga tahun enda. Amin gia i bas tahun enda erbage...